Allanngortitsinerit toqqissisimannginnermik kinguneqartarput
Suleqatigiissitap kommuninut Namminersornerullutillu Oqartussanut, pisortani atorfeqartut kommunini allanngortiterinermut atatillugu nuutinneqassatillugit najoqqutassiat suliarai.
- Allanngortitsineq sunaluunniit sulisuni toqqissisimannginnermik kinguneqartarpoq, atorfimmi qaffasissutsimi sorlermi inissisimaneq apeqqutaatinnagu. Nalornissuteqarneq pissuteqarpat pissuteqanngippalluunniit tamanna sulisut sunniuteqarnerisa ajorseriarnerannik kinguneqassaaq, ajornerpaamillu pisoqarpat atorfimmi soraarniuteqartoqartarluni, nalorninannginnerusutut isigineqartoq siulliutinniarlugu, suleqatigiissitaq allakkiamini mianersoqqussuteqarpoq.
Suleqatigiissitaq pisortani atorfillit akornanni nalornissuteqarnerup annikillisinnissaanut sulisullu nuutitaanissaasa sapinngisamik pitsaanerpaamik pinissaannut qulingiluanik kaammattuuteqarpoq. Ilaatigut kaammattuutigineqarpoq nuutitsinerit tamarmik sapinngisamik inuit nammineq piumassusiat malillugu pissasut, tassalu suliassat nuunneqarnissaat pillugu inatsit akuersissutigineqarluni, taamaalilluni Namminersornerullutik Oqartussani atorfeqartut kommunini suliffeqarniarlutik nuuttussat aammattaaq inissaqarnissartik isumannaarniassammassuk.
Aammattaaq oqartussaaffeqarfiup sorliup atorfinnik atorunnaarsitsinissaanut atasumik ajornartorsiut pilersinnaavoq. Nutaamik kommunerujussuarmi kommunimi sulisumut atorfik pigineqanngippat, taava imatut pisoqarsinnaavoq siullermik kommunerisimasap sulisumik soraarsitsinissani itigartitsissutigisinnaallugu, nutaamillu kommunerisassaq pineqartumut atorfimmik pissaqartitsinani.
Suleqatigiissitamiipput KANUKOKA-mit, Sulisoqarnermut Pisortaqarfimmit aamma Aningaasaqarnermut Pisortaqarfimmit sinniisuutitat.
