Allanngortiterinissaq kinguartinneqassaaq

Namminersornerullutik Oqartussat allaffeqarfimminnik allanngortiteringaatsiarniarnerat qaammat ataaseq kinguartinneqassaaq. Atorfinittussanik oqaloqateqarnerit sivitsuuttoorneqarnerat tamatumunnga pissutaatinniarneqarput.
Allattoq Mads Lynge
decembarip 05-at 2007 12:04

Namminersornerullutik Oqartussat allaffeqarfimminnik allanngortiteringaatsiarniarnerat qaammat ataaseq kinguartinneqassaaq.

Pilersaarutit naapertorlugit pisortaqarfiit maanna 14-iusut ukiortaamiit naalakkersuisoqarfinnut arfineq marlunnut kalaallisut oqalussinnaasunik pisortalerlugit aaqqissuuteqqinniarneqarput, kisianni piffissaliussaq allanngortinneqartariaqassaaq.

Atorfinittussanik oqaloqateqarnerit sivitsuuttoorsimapput, nutaamillu aaqqissuussineq februaarip aallaqqaataaniit atuuttussanngorlugu kinguartinneqarpoq.

Demokraatit naalakkersuinermut tunngasunik oqaaseqartartuat, Palle Christiansen oqarpoq, nutaamik aaqqissuussiniarnerup nunatta karsianut ileqqaarutaanissaa ilimanarpallaanngitsoq.

Taanna nutaarsiassaqartitsivimmut Ritzauimut oqarpoq, allanngortiterinissap qaammammik ataatsimik kinguartinneqarnera sipaarutissani annerpaajussaasoq.

- Naalakkersuisut siulittaasuata naalakkersuisullu suliariniagaat ammip qalipaataanik assigiinngisitsinertupajaaq ippoq, taama oqarnermigut naalakkersuisoqarfiit pisortassaasa kalaallisut oqalussinnaallutillu allassinnaanissaannik piumasaqaat innersuussutigaa.