GBU: Allanik unammisartussaqarpoq sungiusaasussaqarlunilu

Isikkamik arsaallutik nunanut allanut unammisartut GBU-mi siulersuisunik isornartorsiuinerat kattiuffimmi siulittaasuugallartup Gerth Fleischerip tusaatissatut tiguaa. Nunanut allanut unammisartut tunuarpata allanik taarserneqarsinnaalluartut, siulittaasoq oqarpoq.
Assi © : Peter Vest
Allattoq Jaaku Lyberth
aggustip 04-at 2017 10:40

Nunanut allanut unammisartut tusagassiuutinut nalunaaruteqarlutik allapput, sungiusaasumik Tekle Ghebrelulip soraarsinneqarnera akuerisinnaanagu, maanakkullu siulersuisuusut siulersuisutut ingerlatsinerluttut, nunanullu allanut unammisartuunerminnit tunuarnissaq eqqarsaatigigitsik.

- Nunatsinni arsaattartorpassuaqarpoq nunanut allanut unammisartussatut ajukkunnaateqanngitsunik, allat unippata allanik taarserneqarsinnaapput, GBU-mi siulittaasuugallartoq Gerth Fleischer oqarpoq.

- Nutaarsiassaanngilaq, tassami nunarsuarmi assigiinngitsuni nunanut allanut unammisartorpassuit unammisartuujunnaartarput, tamanna nalinginnaasuuvoq, nunatsinniuna aatsaat taama pisoqartoq, Gerth Fleischer oqarpoq.

Tekle Ghebrelulip siusinnerusukkut pissusilersuutigisarsimasai, GBU-p soraarsitsinerminut tunngavilersuutigaa. 

AAMMA ATUARUK Nunanut allanut unammisartut Teklep soraarsitaanera kamaatigaat

Taamalli oqartoqarnera nunanut allanut unammisartut paasinsinnaangilaat, taakkuami isumaqarput, ungiusaasup soraarsinneqarneranut GBU-mi siulersuisut tunngavilersuutigisinnaasaminnik takussutissaateqanngitsut.

Nunanut allanut unammisartut 22-usunik 20-it oqaaseqaatertik pingasunngornermi tusagassiuutinut nalunaarutigaat.
GBU-mi maannakkut siulersuisut isumaqatiginngilluinnarpaat, siulersuisullu tunuanngippata, nunanut allanut unammisartuniikkunnaarnissartik isumaliutigaat.

- Nunanut allanut unammisartut allagaat, tusaatissatut tigusariaqarput, Gerth Fleischer oqarpoq. 

AAMMA ATUARUK Arlalinnik mianersoqqussutinik tunineqareersimasoq

Nunanut allanut unammisartut naatsorsuutiginassusiat GBU-mi siulersuisunit aamma apeqquserneqarpoq. Tekle Ghebrelulimi timersoqatigiiffimmi B-67-mi aamma sungiusaasuuvoq, nunalullu allanut unammisartut arlallit B-67-meersuupput.

- Uanga isumaga malillugu, nunanut allanut sungiusaasoqartariaqaraluarpugut timersoqatigiiffimmut aalajangersimasumut attuumassuteqanngitsumik, Fleischer oqarpoq.
Nunanut allanut unammisartut tunuarnissamik siorasaarutaewqarneratigut, Fleischer siunissamut ernumalinngilaq.

- Sungiusaasorpassuaqarpoq saqqummersinnaasunik, aamma Kalaallit Nunaanni arsaattartut suliniuteqarpoq assigiinngitsunik, unittuunngilluaasarpugut sulineq ingerlavoq, GBU-mi siulittaasuugallartoq Gerth Fleischer oqarpoq.

AAMMA ATUARUK Sungiusaasup soraarsitaanera aalassaataasoq nunarsuaq tamakkerlugu allaaserineqartoq

AAMMA ATUARUK Sungiusaasup soraarsitaanera Nunatsinni isikkamik arsaannermut innarliivoq

AAMMA ATUARUK Isikkammik arsaattartunut sungiusaasoq soraarsitsisoqarnera akerleralugu tunuartoq

AAMMA ATUARUK GBU-mi siulittaasoq soraarsitsisoqareersoq tunuarpoq