Allamiut isiginnittaasiat filmimi illuatungilerniarneqarpoq

’Kalaallit Nunaanni pissutsit ajortuinnaanngillat’, filmiliami piviusulersaarummi, ”Tro, håb og Grønland”-imi, oqariartuutigineqartoq taama nipeqarpoq.
februaarip 19-at 2011 14:27

Danmarkimi nunanilu allani nutaarsiassaqartitsiviit Kalaallit Nunaannut isiginnittaasiat filmiliortartup qallunaap Ivalo Frankip filmiliamini illuatungilerniarsimavaa.

- Filmi Tunumi immiussaavoq, Kulusummi eqqaanilu filmiliaalluni. Nunat assigiinngitsut politikkii aammalu inunnut ataasiakkaanut sunniutaat tassani ersersinniarpakka, Ivalo Frank oqarpoq.

Taanna Kalaallit Nunaanni inunngornikuuvoq kingornalu Danmarkimut nuunnikuulluni.

- Uanga Kalaallit Nunaata kitaani inunngornikuuvunga, taamaattumik Tunu allaanerusumik sammivilerlugu takutikkusussimavara.

Ivalo Frankip filmi piviusulersaarusiaa Københavnimi Nordatlantens Bryggemi ippassaq takuteqqaarneqarpoq.