Arctic Travel Groupip Arctic Umiaq Line pisiarissappagu inuttaasut avataaneersunit taarsersorneqarnissartik annilaanngatigaat, patsisissaqarnerpammi annilaanganissamut?
Arctic Umiaq Linemi inuttaasut sinniisaat Frederik Reimer ullaap tungaa Sarfaq Ittummi angalasoq skibsradiokut attaviloqisukkut isumasiorparput:
Frederik Reimerip annilaanngatiginerarpaa Arctic Umiaq Linep avataaninngaaniit pigineqalernerata kingunerisaanik kalaallit killilimmik sulisorineqalernissaat.
Assersuutitut taavaa Disko 2 tunineqarmat tuluttut oqalussinnaasunik sulisoqartariaqarneq utoqqatsissutigalugu Filippinerinik sulisolersorsimaneq.
Frederik Reimerip sinersortaatinilu sulisut annilaanngatigisaat Arctic Travel Groupip siulittaasuanut anngukkatsigu ima akivoq:
Arctic Travel Groupemi neriuppugut sulisut ingerlatallu amerlanerpaat pigiinnarsinnaassallutigit. Poul Lübbert oqarpoq. Erseqqissaatigaalu pilersaaruteqaratik nunanit allamiunit sulisulersornissaminnik.
Frederik Reimerip tuluttut oqaluttunik taarsersorneqarnissaminnik annilaanngataa aamma pissutissaqarsorinngilaa:
Umiarsuarmi inuttaasut siunissami tuluit oqaasiinik ilinniarnissaminnik pisariaqartitsisut paasigutsigu taava soorunalimi sulisut sapinngisamik annertunerpaamik tuluit oqaasiinik ilinniarsinnaanissaat anguniassagaluarparput, Poul Lübbert, Arctic Travel Groupimi siulittaasuusoq oqarpoq.