"Allamik periarfissaqannginnamik Danmarkimut aallartinneqartarput"

Taamanikkut Kalaallit nunaanni ministeriaqarfik peqatigalugu aalajangerneqarpoq 5.,6. aamma 7. klassit ukioq ataaseq Danmarkimut atuariartortinneqassasut.

1950-ikkunni 60-kkunnilu tuberkuloseqarnerata nalaani eqqiluisaarnerulerneq, inuttullu atukkat pitsanngoriarsimaneri pissutaallutik naalungiarsuit toqusartut ikilerujussuarput, kingunerisaanillu atuarfiit ulikkaartiterlutik.

-Tassa meerarparujussuit atuartunngorput aamma atuarfissaaleqilerpugut, tamakku atuarfiit sanaartorniarnerat soorunami tassanngaannartumik pisinnaanngimmata, Christian Berthelsen oqarpoq.

Neqeroorullu tamanna inuiaqatigiinni tapersersorneqaqaaq.

-Danmarkimut atuariartortitsisarneq angajoqqaanit assorujussuaq akuersaarneqarpoq, aamma isumaqarpunga taakku meeqqat amerlanerit isumaqartut pissanganartuusoq nuna qimallugu allanit taukasaqassalluni aamma atuariartussalluni. Taamanikkut meeqqat qallunaatut ilikkarnissaat angajoqqaanit assut kissaatigineqarpoq.

Naak Qallunaat Nunaanni inuuneq meeqqat ilarpassuinut imaannaasarsimanngikkaluartoq, Christian Berthelsenip qularinngilaa allaanerusumik iliortoqarsimasinnaanngitsoq.

- Meqqat taakku realskolimi atuaqqittussat aamma 7. klassep kingornatigut atuaqqikkumasut, Danmarkiliartinneqarsimanngikkaluarpata amerlasuut katataassagaluarput, Christian Berthelsen oqarpoq.

- Meeqqat Danmarkimiissimasut allaffinni aamma assassornermilu suliffinni ilinniarsimasutut takkussulernerat angumerivara, qallunaat tikisitat taamaalillutik ikilipput, kalaallillu suliassanik nutaanik takusinnaasut amerlillutik, Christian Berthelsen oqarpoq.

1660-kkunni ilinniartitsisussaaleqinerpaaffiummat ilinniartitsisut 25 procentii taamaallaat kalaallisut oqalussinnaapput, sinnerilu qallunaajullutik.