TELE POST-ip automatit namminneq nassitsinissamut sullissiviusut sisamat Uummannami, Kangerlussuarmi, Narsami Nuummilu ikkussuuppai. Automatit illoqarfinni allakkerisarfinni bokseqarfiit ammanerisa nalaanni atorneqarsinnaapput.
- Allakkanik poortukkanillu nassitsiviit atorlugit allakkat poortukkallu nassiunneqarsinnaapput - nalinginnaasut tammatsaalisallu -frimærkinillu pisisoqarsinnaalluni.
Automatimi uuttuuteqarlunilu oqimaalutaaveqarpoq. Pisisartoq allakkanik poortukkamilluunniit nassitsiniaruni takissuseq oqimaassuserlu, kiisalu illoqarfik, nunaqarfik nunaluunniit sorleq nassitsivissaq allassavaa. Akiliutissaq pisiniartup paasissutissiinera malillugu automatip naatsorsussavaa, taavalu nassiunnerata akia akiliutissatut angitigiffaarissoq pisiarineqarsinnaalluni. Automatini Akiliummik Visa Dankortimilluunniit akiliisoqarsinnaavoq.
- Pisiniartartutta tamanna naammagisimaarpassuk Nunatsinni illoqarfinni amerlanerusuni automatit taakkua ivertissorumaarpavut, pisortaq Per Svendsen oqarpoq.