Allakkatigut taasivissat nunaqarfimmi Saattuni amigaataapput

- Taasiartoraluarama paasivara taasivissanik Saattunut tikisitsisoqarsimanngitsoq. Saattuni allaffimmiut Uummannamut paasiniaaqqaarniaramik oqarfigaanga utaqqisariaqartunga. Tamatuma kingorna paasivara ilumut allakkatigut taasivissat Saattuni amigaatigineqartut, oqarfigineqarpungalu Uummannamut piguma allaffimmut taasiartorsinnaasunga.

Saattormiu Hans Mathiassen taama oqarpoq. Hans Mathiasseni Sisimiuliannginnermini allakkatigut taasinissani aalajangerpaa, aatsaat ulloq qinersivik nalliuppat nunaqarfimminut Saattunut utertussaanini pissutigalugu.

- Ulloq qinersivissaq nallerpaat Saattunut aatsaat tikittussaagama taasiartoraluarpunga, tassami silamik akornuteqarlunga tikinngitsuussagaluaruma taasisinnaajunnaassagama.

Hans Mathiassenip inuttut pisinnaatitaaffiit ilaasa taama pingaaruteqartigisut ilaannut peqataasinnaajunnaarsitaanini tupigaa.

- Tamatsinnut pingaaruteqarpoq qinersisoqartillu taasinissaq. Taamaattumiguna aallartussaanera pillugu allakkatigut taasisinnaanissaq atorluarniarsariginga. Uanga isumaliortaasera naapertorlugu allakkatigut taasivissat taama kingusitsigisukkut nassiunneqarsimaneri sullissinerlunnertut taasinnaavara, Hans Mathiassen oqarpoq.

Saattuni kommunip allaffiani allaffimmioq, Sara Løvstrømip oqaatigaa, allakkatigut taasivissat nunaqarfimmut nassiunneqarsimannginneri, Qaasuitsup Kommuneata kukkuneratigut piffissaagallartillugu nassiunneqarsimanngitsut.

- Paasiniaagama taasivissat nassiussat pillugit, oqarfigineqarpunga Uummannamiit taakku ingerlateqqinneqanngitsoorsimasut.

Saattuni kommunip allaffiani allaffimmioq, Sara Løvstrøm taama oqarpoq.

Hans Mathiassen Sisimiunut ingerlaartilluni, Ilulissani Qaasuitsup Kommunianut paasiniaanermi kingorna, kommunip allaffiani aatsaat taasitinneqarpoq.