Allakkat isertuussat Wikileaks-ikkut saqqummersut misissuiffigilerpaat

Allagaatit tuusintilippassuit Afghanistanimi inuit sakkutuujuunngitsut inuunerannik akeqarsinnaapput. Taama naliliivoq qallunaaq sakkutooqarneq pillugu misissueqqissaartartoq. Tassami sakkutuut nunami allamiut Afghanistanimiullu akornanni suleqatigiinneq ilaatigut ima erseqqitsigisumik allaaserineqarsimammat tamanna Talibaninit allaat ilisarineqarsinnaalluni.

Taama isumaqarpoq sakkutooqarneq pillugu misissueqqissaartartoq Kenneth Buhl sakkutooqarneq pillugu qitiusoqarfimmeersoq, taannalu arlalinnik assersuutissaqarluni. Tamanna pingaartumik inunnut immaqa marloqiusamik sullissisimasunut ajornartorsiuterujussuanngorsinnaavoq. Immaqa Talibanit isumaqassajunnarsipput taakkua namminerminnik tapersersuisuusut peqatigisaanilli NATO-mik suleqateqarlutik, Kenneth Buhl oqarpoq.

- Tamanna tamaani najugaqartunut tassuuguinnaq kingunipiloqarsinnaavoq taakkua Talibaninit Al Qaedamilluunniit arlaatigut malersorneqalersinnaammata, saassunneqarsinnaallutik toqutaallutillu.

Wikileaks-imik pilersitsisup Julian Assange-p inuit sakkutuujunngitsut pisuussuteqanngitsullu ilanngunneqannginnissaat assorsuaq ilungersuutigigaluarpaa.

Allagaatit 15.000-it suli tamanut saqqummiunneqanngillat, Afghanistanimi sakkutuujunngitsunut paasissutissarsiffiit illersorniarlugit allagaatit kikkunnut tunngasuunerisa paasinarunnaarsinneqarnissaat pissutigerpiarlugu. allagaatinili tamanut saqqummiunneqareersuni paasinarunnaarsaaneq taamaattoq naammaqqajanngitsoq Kenneth Buhl oqarpoq, tassami inuit sakkutuujunngitsut aqqi peerneqarsimagaluartut nunami sumiinneq pillugu suleqatigiinnillu oqaluussinerit pillugit allaaserisanik eqqartuinerit Talibaninit paasineqarsinnaammata, Kenneth Buhl oqarpoq.

- Uanga nammineq inuttut isumaqarpunga tamanna akisussaassuseqanngitsumik iliornerusoq inuillu allat inuunerannik akeqarsinnaasoq, Kenneth Buhl naggasiivoq.