Allakkanik qaartartumeerutinik nassitsisimasup tigummigallagaanera sivitsorneqarpoq
Poortugaq allakkanik qaartartumeerutinik imalik Torben Nielsenimut nassiunneqarput, Torben Nielsenillu arnaanik sallunaveeqqutitut tigumminnissimaneranut atatillugu angut 39-nik ukiulik pissutissalimmik politiinit pasisaalluni tigummigallagaalluni.
Torben Nielsenimut toqumik sioorasaarisimasutut angut 39-nik ukiulik aamma tigummigallarneqartoq, Herning Folkebladip nittartagaani atuarneqarsinnaavoq.
Angut 39-nik ukiulik oqarpoq Torben Nielsenimit 527.000-it koruuninik tillinniarfigitissimalluni. Pinerluuteqarsimasut inissinneqartarfianneereerlutik angut 39-nik tillinniarfigitissimanerarpoq, Torben Nielsenilli tamanna ilumuunnginnerarpaa.
Poortugaq allakkatigut Aasiannut nassiussaq Kangilinnguani sakkutooqarfimmit misissorneqareerluni qaartartuiunngitsoq paasineqarpoq.
Poortugaq sumiissusersiummik GPS-imik imaqarsimavoq, Torben Nielsenilu taamaasilluni 39-nik ukiulimmit sumiissusersineqarsinnaasimassagaluarluni.
- Aasianni amutsivimmi suleqatikunnit paasivara Torben Nielsen Danmarkimut nuussimasoq. Taamaammat GPS-i Torben Nielsenip Aasianni adressiannut nassiuppara, poortukkap Torbenip Danmarkimi adressitaavanut nassiuteqqinneqarnissaa neriuutigalugu, angut 39-nik ukiulik killisiorneqarnermini oqarpoq.