Allakkanik angallassineq allanngortiterneqangaatsiarpoq

Angallannerup nutaamik aaqqissuussiffigineqarnera Qeqertarsuup Tunuani allakkanik angallassinermik allanngortiteringaatsiarnermik kinguneqarpoq.

Angallavinnik allanngortiterinermini allakkanik angallassinermik Royal Arctic Line aamma KNI TELE-POST-ip isumaqatigiissusiorfigai.

Allakkat Air Greenlandip qulimiguua atorlugu nalinginnaasumik ingerlanneqartaraluarput, tamannali aasaanerani unitsinneqarmat, tamanna Qasigiannguanut Qeqertarsuarmullu ajornartorsiortitsilerpoq.

Soorunami tamanna pitsaanerpaajunngilaq, taamaammallu Disko Line illoqarfinnut taakkununnga allakkanik ingerlatsisarnissamik TELE-POST-ip maanna isumaqatigiissuteqarfigaa, Tele ilisimatitsivoq.

Air Greenlandip Qasigiannguanut ukioq manna decemberip ulluisa sisamaanniit angalaqqilernissaata tungaanut Disko Linemik isumaqatigiissuteqarneq ingerlassaaq.

Allannguutit ajornartorsiortitsimanerat tusagassiuutitigut nalunaarummi TELE-POST-ip ajuusaarutigaa.