Allagatoqqanik nassaartoqarpoq
Sisimiuni KGH-usimasoq pillugu katersaatit toqqortaatillu ukiorpassuarni amigaatigineqarsimapput, massakkulli tamanna ajornartorsiutaajunnaarpoq, Naalagaaffiup toqqorsiviani allakkiatoqqat aningaasaqarnerlu pillugu nalunaarutitoqqat 1918-imiit 1951-ip tungaanut KGH-usimasumi katersarineqarsimasut toqqorsivimmut 23 meterisut takitigisumut toqqorneqarsimasut nassaarineqarmata.
Naalagaaffiup Toqqorsiviata allanngortiterneqarnera iluatsillugu Sisimiuni KGH-usimasumi allakkiatoqqat nassaarineqarput. Nunatta allagaateqarfia Nuummiittoq aperineqarpoq allakkiatoqqanik tigusinissamut soqutiginninnersoq akuersaarluinnarporlumi.
Umiarsuaq Hans Hedtoft umiummat allagaatitoqarpassuit annaaneqarput, taamaattumillu allagaatitoqqat Sisimiuneersut Naalagaaffiup toqqorsiviani nassaarineqarnerat assut qujanartoq, ingammillu Sisimiut ukiunik 250-iliinerat eqqorlugu taama nassaartoqarnera nuannaarutissaasoq, Niels Frandsen, Nunatta Katersugaasiviani allagaateqarfianeersoq oqarpoq.
