Allagaqaatinik takunnissinnaanernik Aalborgip Umiarsualivia illersorneqassanngilaq

Aalborgimi Umiarsualivik pisortat ingerlataat pillugit inatsimmi nutaami ilaatinneqassanersoq ilaatinneqassannginnersorluunniit Aalborgimi sivisuumik sakkortuumillu oqallisigineqareersorlu kommunimi qullersat ippassaq aalajangiiffigaat, Umiarsualivik allagaatinik takunnissinnaatitaanermut illersorneqassanngitsoq.
Allattoq Carla Davidsen
januaarip 07-at 2014 09:47

Kommune Aalborgip Umiarsualivianik 98 procentimik piginneqataavoq, taamaammat inatsimmi tamanut atasumi paragrafip iluani umiarsualik inissisimalluni, tassalu pisortat 75 procenti sinnerlugu piginneqataappata allagaatinik takunnissinnaatitaanissamut qinnuteqartoqarsinnaasoq inatsimmi allassimavoq, Aalborgillu Umiarsualiata allagaataanik taamaalilluni takunnittoqarsinnaanngorpoq.

Aalborgimi Umiarsualivik tamaviaarluni akerliugaluarpoq, ilaatigut ernummatigigamiuk nammineq atsiornikkut isumaqatigiissutini, soorlu Kalaallit Nunatsinnut angalasarnini, takuneqarsinnaalissasut.

- Royal Arctic Line eqqarsaatigalugu, Kalaallit Nunaannut angalasarnissaq pillugu tuniniaalerutta paasissutissat unammillertitsinnut pingaaruteqartorujussuusinnaapput, Aalborgip Umiarsualiviani pisortaq, Claus Holstein, aviisimut Nordjyske Stiftstidendemut oqarpoq.

Aalborgimili borgmesterip, Thomas Kastrup-Larsenip, isumaa allanngortitassaanngilaq:

- Pisortat ingerlataat pillugit inatsisitaareernerput aallaavigisariaqarparput, inatsit taanna Aalborgip Kommunianut, kommunillu suliffeqarfiutaanut, aamma kinguneqartussaavoq, borgmesteri, Thomas Kastrup-Larsen, aviisimut Nordjyske Stiftstidendemut oqarpoq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq