Allaffissorneq pisariillisarniarpaat

Pisortat amerlassusiisa ikilisaavigineqarnissaat, suliallu aalajangersimasut annertunerusumik aallunneqarnerulernissaat.

Namminersornerullutik Oqartussani allaffissornerup aaqqissuuteqqinnissaanut siunniussat ilaat tamakkuussapput.

Suleqatigiissitat aasap ingerlanerani arlaleriarlutik ataatsimeeqatigiittareerput, kingusinnerpaamillu decembarip aallartilaarneranut nutaamik aaqqissuusseqqinnissamik pilersaarummik saqqummiussisussaallutik.

Namminersornerullutik Oqartussani allaffissornikkut pisariillisarneqarnissaanut siunnersuut ukioq manna juunip qaammataani aallartinneqarpoq, nunattalu oqartuassaanikkut nammineernerulernissaa iluuseqarnikkut aatsaat angujartuaarneqarsinnaasoq aamma oqaatigineqarluni.

Pisortat ikilisarneqarniarneranni soraarsitsisarnikkut pissanngillat, pissusissamissortumilli soraartoqartarnera aammalu atorfinnut allanut nuutitsisarnerit aqqutigalugit pissalluni.