Allaffeqarfissuit iluariunnaarpaat

Allaffeqarfissuit ammaannartut mutiusorujussuupput. Maannali sulliviit ilaasa allaffeqarfiit taamaattut iluariunnaarpaat, tassami sulisut ilarpassuisa allaffissuit ammaannartut iluarinngimmatigik. Taamaattumik sulliviit amerliartuinnartut allaffissuit ammaannartut piunnaarlugit akunnequtit allaffiillu minnerusut pingaartinnerulersimavaat.

- Taamaattut eqqissilluni sulinissamut periarfissiinerupput, taama oqarpoq sullivimmi avatangiisit pillugit ilisimatusarfimmi siunnersortaaneq, Jan Peitersen. Taassuma oqaatigaa inuit allaffeqarfissuarni ammaannartuni sulisut nipiliorpallaarneq, niaqorlunneq suliamillu aallussisinnaannginneq naammagittaalliuutigisaraat, aammattaaq inuit alaatsinaanneqarnissartik nuannarinngilaat.

- Sulisut nalunaarutigisarpaat eqqissillutik sulinissamut periarfissalunnertik. Allat oqaluppalunnerinit ajoqusersorneqartarnertik, aammali allanit tusaajumaneqanngitsutut misigisimasarlutik. Tassa taamaalilluni allaffissuarni ammaannartuni tatigeqatigiilluni oqaloqatigiissinnaaneq, suleqatigiinnermi pisariaqartinneqartartoq, ajornakusoorsinnasarpoq.

Allaffissuit ammaannartut iluaquteqarlutillu pitsaanngequteqartut Teknologisk Institut-imi siunnersortaaneq Birgit Lytker oqarpoq.

- Allaffeqarfissuit ammaannartut suliffeqarfiit ilaannut iluaqutaasarput, tassa kikkut tamarmik immikkut allaffeeralersornerinit, ilisimasanik paarlaateqatigiinnissamut oqaloqatigiinnissamullu periarfissiinerusaramik, Birgit Lytker oqarpoq.

Sulisut ilaasa naammagittaalliuutigisarpaat allat oqalunnerannit oqarasuaatinillu tiguneqanngitsunit akornusersorneqartarnertik. Siunnersortaaneq Jan Peitersen oqarpoq tamanna suliffiup nuannersuunissaanut akornutaasartoq.

- Tamakkua suliffimminnik nuannaarutiginninnginnerusarput aamma misissuinerit suli naammassineqanngitsut ersersippaat sulisut taamatut misigisimasut naammassisakinnerusartut, Jan Peitersen oqarpoq.