Aligoqqinnik piiaanissaq isumalluarfigineqarpoq

”Aligoqqiit nivissap ikinngutigilluarpai” filmiliaritittartuusimasup Marilyn Monroep oqaasinnaava nunatta ikinngutigillualersinnaassavai, Kangerlussuarmi aligoqqimmik piiassallugu imminut akilersinnasumik nassaarnermi.

Ujaqqat piiakkat 160 kiilut misissoreerlugit Canadamiut aligoqqinnik nassaarsimapput. Canadami ujarassioqatigiit Hudson Resources Inc.-ip pisortaata James Tuer-ip nassaaq annerpaaq milimiiterisut marluttut mikitigigaluartoq isumalluarlunilu naammagisimaarinnippoq.

James Tuer-ip Kangerlussuup eqqaata angallaviginnera aligoqqinnik piiaalernissamut naleqquttuunerarpaa.

Mittarfeqareerpoq, kangerlualu umiarsuarnik angisuunik pulaffigineqarsinnaalluni. Hudson Resources Inc.-ip nalilerpaa aligoqqiit kusanangaarmata pinnersaatissiarissallugit naleqquttut.

Nassaat ilagigujaat aligoqqik aappalarujuttoq, qaamasuninngarnit akisunerusoq.

Nunattali qanoq iluaqutigisinnaavaa, qaqugulu piiaasoqalissava?

Ujarlernermi ukiormanna 7 mio. kr.-t aningaasartuutigaavut, aappaagulu 11,5 mio. kr.-t atussallugit naatsorsuutigaarput, James Tuer. Aningaasat akunnittarfimmiinnernut, timmisartunik helikopterinillu Air Greenland-imit attartornernut atorneqassapput.

Tunisassarissallugit imminut akilersinnaanersoq suli misissorneqarallassaaq; nassaallu tunngavigalugit akilersinnaasumik piiarnissaat neriunaateqarpoq.

Aligoqqinnik ujarlersut Canadamiut aappaagu februaari-marsimi misissueqqilissapput.