Aligoqqinnik Nunatsinneersunik nioqquteqarneq ajornannginerulerpoq
Kalaallit Nunaanni sermersuaq aappat amerlasuut neriuutigaat nuna aligoqqinnik qillalaartuinnaassasoq. Tamakkuli qillalaartorsuit nunanut allanut tuniniarniaraanni nunarsuarmioqatigiit suleqatigiiffiannut ilaasortaasariaqarpoq, aligoqinnimmi niuerneq nunat assigiinngitsut akornanni sukannersorujussuarnik killilersuiffigineqarput.
Suleqatigiinnerup qulakkiissavaa aligoqqinnik piiaaffiit sulisoqarnikkut avatangiisitigullu pitsaasuunissaat, pisisussallu paasissutissiissutigineqassallutik. Maannamulli Kalaallit Nunaat taamatut suleqatigiinnerup avataaniittariaqarsimavoq.
Europaparlamentimi taasisoqarneratigut isumaqatigiissummut Kalaallit Nunaat ullumi ilanngunnissaminut ammaanneqarpoq. Aligoqqinnik niuerneq eqqarsaatigalugu siunissami EU'p Kalaallit Nunaat EU-mi ilaasortatut naatsorsuutigisassavaa.
Suleqatigiinermut taamatut ittumut piumasaqaataavoq nunap suleqataasup namminersortutut akuerisaanissaa. Kalaallit Nunaat namminersortuunngilaq. Pisortatigoortumik Danmarkimut ilaavugut, kalaallillu amerlasuut aligoqqinnik nioqquteqarnerup aningaasaqarnerup ineriartortinnissaanut pingaartuutippaat. Ullumikkut Kalaallit Nunaata avataaniit aningaasalersorneqarnissani pinngitsoorsinnaanngilaa, aalisarnikkullu isertitat pingaaqaat naak pisassat sakkortusingaluttuinnartunik killilersungaangaluartut.
Suli ilisimaneqanngilaq aligoqqiit qanoq annertutigisut Kalaallit Nunaanni nassaassaanersut, aatsitassarsiorfiilli nunatta kitaa assorsuaq neriulluarfigaat.
Aligoqqinnut tunngatillugu Kalaallit Nunaat EU-mi ilaasortatut akuerineqassanersoq EU-mi naalakkersuisut akuereqqaartariaqassavaat. Taamatullu akuersisoqarnissaa ilimanaateqartorujussuanngorpoq.