Aligoqqinnik nassaarneq isumalluartitsivoq
Ujaqqanik erlinnartunik piiaatitseqatigiiffik Peregrine Diamonds, sapaatip akunnerani kingullermi nalunaarpoq, piiaaffimmi Silliami, Qeqertaalummi Iqaluit kujataani kangiani 100 kilometerinik ungasissulimmiittumi neriunaatilinnik nassaarlutik.
Peregrine Diamonds piiaaffinnillu ingerlatsisut allat Nordvest-territoriami, Nunavummi Nunavimmilu aligoqqinnik siornatigut nassaareerput, mannalu tassa nutaanik nassaartoqarneratigut annertunerusumik piiaasoqalernissaa periarfissaqalerluni, aamma piffissaq ungasinnerusoq isigalugu Canada nunarsuatsinni aligoqqinnik tunisassiortutut annerpaanngorsinnaalluni.
Nordvest-territoriami piiaaffinni aligoqqiit piiarneqartut nunarsuatsinni pitsaanerpaatut isiginiarneqartarput. Tamatuma saniatigut piiaaffiit aattaqanngitsumik piiaaffittut taaneqartarnertik ilisarnaatigaat, tassa aligoqqiit inussianik sulisoqarluni piiagaanngimmata. Tamatuma kinguneranik aligoqqiit Canadameersut nunarsuatsinni pisiariumaneqarnerusarput.
Taamatut nassaartoqarnera Nunavummi naalakkersuisunut nutaarsiassatsialassuuvoq, tamaanimi annerusumik aatsitassarsiornissaq siunnerfigineqarmat.
