Aligoqqiit EU-mut tunisaasinnaanersut misissorpaat

Aligoqqinnik Kalaallit Nunaanneersunik EU-mut tuniniaasoqarsinnaanersoq, Namminersorlutik Oqartussat maanna misissorpaat. AG-p nittartagaani tamanna atuarneqarsinnaavoq.
Allattoq Jens Thorin
juunip 23-at 2009 07:14

Piginneqatigiffiit marluk Hudson Resources aamma Avannaa Resources aligoqqinnik katillugit 3.000-inik Nunatsinni nassaareersimapput. Aligoqqiillu taamaalillutik Nunatta aningaasaqarniarnikkut siunissaanut qammarsaataallualersinnaapput.

AG naapertorlugu aatsitassanut ikummatissanullu pisortaqarfik Nunattalu Bruxellesimi sinniisoqarfiani eqqussuinissamut akuerineqarnissaq siunertaralugu EU-Kommissionimeersunik arlaleriarlutik ataatsimeeqateqareerput. Nunatsinnut pingaartuuvoq, Kimberley-procesimik pineqartartumi peqataanissaq, ersersinniarlugu, aligoqqiit suli kusanarsarneqanngitsut, nunanit sorsuffiusuninngaanneersuuunngitsut.

Ilisimaneqarluarpoq isorineqartuullunilu, aligoqqinnik nunanut allanut niuffannerup ilaatigut Afrikami inuiaqatigiit sorsunneri akilertarmatigit. "aligoqqinnik aattalinnik" taaneqartartut inunnit, qaarusunni atugarliungaarnerminnik toqqutiginnitttartunit, piiarneqartarput.

Tamaammat aligoqqinnik suli kusanarsarneqanngitsunik Europami tuniniaaniaraanni Kimberley-processen peqataafigisariaqarpoq. Nunatsinnit ukiuni tulliuttut marluk pingasulluunniit qaangiuppata ilanngussimanissaq siunertaavoq.