Alibak Steenholdt toquvoq

Inatsisartut siulittaasuusartut taarserartut sanianni Alibak Steenholdt issiajuartarsimavoq allattoqarfimmi pisortatut qulakkeerisuulluni nunatsinni inatsisiliornerup pissusissamisut ingerlanissaanut.

Nunatsinni qinikkanik sullissilluni atorfeqarnera 1973-mi aallartippoq landsrådimi allaffimmi atorfilittut aallartikkami. Tamatuma kingorna allaffimmi pisortanngorpoq inatsisartunilu 1979-mi allattaaalerluni. Atorfik taanna ingerlappaa 1999-mi soraarninngornissami tungaanut.

Inatsisartut siulittaasuat Josef Motzfeldt Alibak Steenholdtimut eqqaaniummik ullumi nassiussaqarpoq.

'Alibak Steenholdt 1972-imi Københavnimi ilinniarnertuut ilinniarfissuanni inatsisilerituutut naammassivoq. 1973-imi nunatsinni qinikkanik sulissinera aallartippoq, taamanikkut nunatta Landsrådiini fuldmægtigitut atorfinikkami.

1979-imi Namminersornerulluni Oqartussaanerup eqqunneqarnerani Alibak Steenholdt Inatsisartut allattaattut atorfinitsinneqarpoq, piffissami 1988-imiit 1996-imut aamma tassani allattoqarfimmi pisortaalluni, kiisalu piffissami 1996-imiit 1999-imi soraarninngornissami tungaanut pisortatut atorfeqarluni.

Alibak Steenholdt 1989-imi kunngikkormiut nersornaasiuttagaanik Ridder af Dannebrogsordenimik nersornaaserpoq, 1996-imi sølviusumik Nersornaaserneqarluni kiisalu 1999-imi kuultiusumik Nersornaaserneqarluni.

Misiginneqataanerput qimagaasunut ingerlatipparput.
Eqqaaneqarnera ataqqinartuuli.'

Josef Motzfeldt taama allappoq.

Alibak Steenholdt 78-nik ukioqarluni toqukkut qimaguppoq.