Aleqap Thorning ataatsimeeqatigissavaa

Aleqa Hammondip ministeriuneq Helle Thorning-Schmidt aqagu ataatsimeeqatigissavaa. Uran pillugu suleqatigiinnerup malitseqartinneqarnera, suliniutit angisuut pillugit pilersaarutit - tamatumunngalu Danmarkip inatsisitigut malitseqartitsinissaa, Issittoq pillugu suleqatigiinneq, Immap naqqata nunavimmut atasortaata killinga pillugu suliniutit, aamma inatsisitigut ataataqanngitsut, ataatsimiinnermi oqaluuserineqartussanut ilaapput.

Tamakku saniatigut, Naalakkersuisut Siulittaasuat qaaqqusisoralugu, Nunatta Sinniisoqarfiani Københavnimiittumi ileqquusumik ukiortaarsiorluni ilasseqatigiissitsineq sisamanngornermi  januaarip ulluisa qulingiluaanni pissaaq. Aleqa Hammondip USA-p Danmarkimi aallartitaa, Rufus Gifford, ulloq taanna siusinnerusukkut naapissavaa.

Naalakkersuisut Siulittaasuat taamatuttaaq tallimanngornermi januaarip ulluisa qulinganni Dronningimik naapeqateqarnissaminut qaaqqusaavoq, tamatumalu kingorna Danmarkimi nunanut allanut tunngasunut ministerimik Holger K. Nielsenimik ulloqeqqasioqateqarluni ataatsimeeqateqassaaq.

Tamatuma kingorna Naalakkersuisut Siulittaasuat Bruxellesiliassaaq, Nunatta tassani Sinniisoqarfiani ukiortaarsiorluni ilasseqatigiissitsissalluni.

Aleqa Hammond Arctic Frontiersit ukiumoortumik ataatsimeersuarnissaannut, Norgemi Tromsømi januaarip ulluisa 21-anni pisussamut, aamma qaaqqusaavoq, tassanilu norgemiut ministeriunertaavannik, Erna Solbergimik, ataatsimeeqateqarnissaminut periarfissaqassalluni.
 
Naalakkersuisut Siulittaasuat Nuummut januaarip ulluisa 24-anni utissaaq.