Assi: Siumut Folketingimi

Aleqap Samuelsen Issittumut pillugu arajutsisaqarnerarlugu isornartorsioraa

Nunanut allanut tunngasunut ministereqarfiup Issittoq pillugu ukiumoortumik nalunaajaanermini pingaarnerpaaq eqqaanngilaa: Issittumi sakkutooqarnikkut annertusaaneq USA-llu Pituffimmi suliai. Folketingimut ilaasortaq, Aleqa Hammond taama isumaqarpoq.

Nunanut allanut tunngasunut ministerip, Anders Samuelsenip (LA) – Nunanut allanut ministereqarfimmi sulisunit ikiorneqangaarluni Issittumi pisut pillugit ukiumoortumik nalunaajaataa Folketingimi marlunngornermi oqallisigaat.

Folketingimili inatsisartunullu ilaasortap, Aleqa Hammondip nalunaajaat isornartorsiungaatsialereerpaa. Altinget Arktisimi oqallinnermi ilanngussakkut taamaaliorpoq.

Tassalu danskit nunanut allanut ministeriata Issittumut tunngatillugu pingaaruteqarnerpaat ilaat, tassalu sakkutooqarnikkut annertusaaneq Pituffimmullu tunngasut, nunanut allanut tunngasunut ministerip ilanngutinngikkai, Hammond isornartorsiuivoq.

AAMMA ATUARUK Tuluit Issittumi sakkutuuliisut

- Putinip Kalaallit Nunaannit 1.000 kilometeriniinnarnik ungasitsigisumi, qeqertani Franz Josef Landimi sakkutooqarfik ammaqqikkaa sakkutooqarnerlu annertusaleraa, kingullikkut tutsiuppoq. Tamanna ilutigalugu Ruslandip umiarsuit aqqartartut nutaat igeriuttagalinnik sakkortungaaramik suli unitseriutissaqanngitsut sanavaagooq, Aleqa Hammond, aamma Inatsisartuni nunanut allanut sillimaniarnermullu ataatsimiititaliami siulittaasuusoq, allappoq.

Aleqa Hammondip Ilulissani isumaqatigiissut, Issittup saqitsaassutigineqannginnissaanut Ruslandip, USA-p, Norgep, Canadap Kunngeqarfiullu Danmarkip akornanni isumaqatigiissummik ilaqartoq, maanna malinneqanngitsoq tikkuarpaa.

Aleqa: Pituffimmi sakkutooqarfik USA-mut pingaarnerulersoq

Issittoq pillugu nalunaajaat ilisimatusarneq, avatangiisit, silap pissusia, Issittumi imaatigut angallanneq Qalasersuullu imartaata killeqarfilersornissaa ilaatigut ilaatinneqarput. Pituffimmulli tunngatillugu ataasinnguamilluunniit eqqaasaqarani.

USA-llu avataarsuani sakkutooqarnermik pilersitsinialeruttornerani Kalaallit Nunaannilu mittarfinni attaveqaatinik alliliiniarnermut soqutiginninnerarnerani tamanna kanngunarsaataavoq. Taamammi periuseqalernermi Pituffik USA-mut pingaaruteqarnerulissaaq – taamaalilluni tamanna Kalaallit Nunaannut navialissutaasinnaalluni, Aleqa Hammond isumaqarpoq.

AAMMA ATUARUK Mittarfiliortiternermut aningaasaliissutit USA peqatigalugu oqaluuserineqarsimasut

Tamannalu Samuelsenip nalunaajaataani ersittariaqaraluartoq, Hammondip erseqqissaatigaa.

- Danskit Folketingimi ilaasortaasa Issittumi allanngoriartortoqangaatsiarneranik Danmarkilu Kalaallit Nunaat aqqutigalugu sumut ilaalersimanersoq pillugu paasisaqarnissaat pingaaruteqarpoq. Tamatumunnga atatillugu Folketingip Issittoq pillugu oqallisiginninnerani takorruuisinnaasoqarneruneranik paasiniaaqqissaartoqarneranillu kissaatigisaqartoqarsinnaagaloqarpoq.

Issittoq pillugu nalunaajaatip oqallisigineqarnera Folketingets TV-iatigut isiginnaarsinnaavat.

AAMMA ATUARUK Ruslandi sikunik aserorterutinik amerlanerusunik atorfissaqartitsisoq

AAMMA ATUARUK Kangerlussuup mittarfiata siunissaa pillugu USA oqaasissaqartitaasoq

 

 

 

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat