Aleqap pissuserissumik oqallinnissaq ujartorpaa
Aleqa Hammondip Facebookikkut allagai aalassassimaarutigineqaqaat, Naalakkersuisut siulittaasuata Kuupik V. Kleistip nulia, Aatsitassarsiornermullu naalakkersuisup Ove Karl Berthelsenip nulia, suliniutinut angisuunut inatsisissap akuerineqarnissaanut atatillugu soqutigisaqarsinnaasutut Aleqa Hammondip oqaatigigamigit.
Taamaannerarpaa, arnat taakku marluk Nuup Kangerluani Qeqertarsuarmi ujaqqanik pinnersaasiassanik ujarlernissamut siusinnerusukkut akuersissuteqarmata.
”Naalakkersuisut siulittaasuata nulia aammalu aatsitassanut naalakkersuisup nulia qanoq nuannaartigissappat Suliassanut Angisoorsuarnut inatsisissap tuaviuunneqarnerannut - qinersisoqannginnerani. Allamik oqarfiunngilaq, ilami taakkua aatsitassarsiorfinnik ingerlatsimmata”, Aleqa Hammond Facebookimi taama allappoq.
Aleqa Hammondillu taama allannera ilaatigut Maliina Abelsenimit, Mimi Karlsenimit Jens B. Frederiksenimit, inuttaasunillu allarpassuarnit isornartorsiorneqarpoq.
- Eqqunngitsumik allannermi saniatigut suliniutit angisuut pillugit inatsissaq, sulianut koruunit milliardit sinnerlugit aningaasartorfiusussanut naatsorsuussaasoq, ujaqqanik pinnersaasiassanik ujarlernissaq nunaminertami mikisumi pisussaq kakkersuppaa, Jens B. Frederiksen allappoq.
Aleqa Hammond-illu isornartorsiorneqarnini maanna kinguneqartippaa, Facebookimi allassimasani ajuusaarutigalugu.
- Ajuusaarutigaara Facebookimi allagara peqqutigalugu aalassassimaartoqartitsinera inuillu kisiisa ataasiakkaat pineqartutut isigilersitsisoqarsimassappat. Uanga tunginniit kukkuneruvoq tamannalu qupperninniit allassimasoq peerpara, Aleqa Hammond, Siumup siulittaasua allappoq.
- Neriuppunga tamatta inuinnaallutalu kukkussuteqarsinnaanerput paasisinnaassagaat tamannalu ajuusaarnikkut takutikkumavara, Aleqa Hammond oqarpoq neriuutiginerarlugulu oqallinneq inuttarsiorfiunngitsumik pitsaaumillu ingerlanneqarumaartoq.
