Aleqap Palle ilumuunnginnerarpaa
Naalakkersuisunut ilaasortap Palle Christiansenip tupat imigassallu akileraaruteqanngitsut Nunatsinnut eqquteqqusaajunnaarnissaannut atatillugu illuatungiliuttut Landskarsimut isaatitsisussanik nutaanik siunnersuutissaqannginnerat ippassaq ilaatigut pissutaanerarmagu, Siumup siulittaasuata Aleqa Hammondip ajuallaatigaa.
- Siumut Inatsisartuni kisiartaalluni aningaasalersuinissamik siunnersuuteqarpoq, tassami suliffeqarfissuit Nunatta avataaneersut akuersissummik tunineqartartut, Nunatta karsianut akitsuummik akiliisalernissaannik Siumut siunnersuuteqarmat, Aleqa Hammond oqarpoq.
Siumup siunnersuutigaa, suliffeqarfiit uuliasiornermik aatsitassarsiornermillu ingerlatsiniartut, misissueqqissaarnissamut piiaasinnaanermullu akuersissummik pinermikkut, 2,5 millionit koruuninik akitsuummik akiliisassasut.
Aleqa Hammondip oqaatigaa, taamaalilluni ullumikkut akuersissutit 154-iusut eqqarsaatigalugit, taamatut akiliisitsisoqartartuuppat 385 millionit koruunit isertinneqassagaluartut. Kisianni siunnersuut tamanna naalakkersuisoqatigiinnit itigartinneqarpoq, naalakkersuisoqatigiit aningaasanik inuit kaarsarfiinit aallerusunnerummata, Siumup siulittaasua ilaatigut taama allappoq.
