Aleqamik sullisserusuttoqarsimanngilaq
Naalakkersuisut siulittaasuata qanimut suleqatiginissaa soqutigineqarsimanngilaq. Aleqa Hammond tusagassiinermi ataqatigiissaarisussamik sulisussarsiormat marluinnaat qinnuteqarsimapput. Tamanna Palle Christiansenip § 37 naapertorlugu apeqquteqaataanut akissummi erserpoq.
Allattoq Peter Troelsen, Simon Uldum
aggustip 27-at 2013 11:17
Atorfimmut, Julie Rademacherimut tunniunneqartussaarpasittumut, qassit qinnuteqarsimanersut Hammondimut apeqqutigaa. Naalakkersuisullu siulittaasuata tassunga akissutaa naatsunnguuvoq. Qinnuteqartut marluupput, aappaalu oqaloqatigiinnissamut aggersarneqarpoq.
Atorfimmut amerlanerusunik soqutiginnittoqarsimannginnera eqqumiiginarsinnaavoq, tusagassiortummi isaanit isigalugu Kalaallit Nunaanni atorfiit pissanganarnerpaat ilagigaluarpaat. Imaassinnaavoq qinnuteqarniaraluartut, Julie Rademacherip qineqqusaarnerup nalaani kingornalu Aleqa Hammondimut tusagassiinermi ataqatigiissaarisuuneratigut atorfiup inuttalerneqareersimanera paaseriaramikku qinnuteqanngiinnarsimasut.
