Aleqa: Urani pillugu oqallinnermut Danmark soorunami qisuariassaaq

Aatsitassat qinngornernik ulorianartunik akullit piiarneqarneri avammullu tuniniarneqarneri, Kalaallit Nunaata kisimi akisussaaffigai, islandimiup nalagaaffiit innuttaasa pisinnaatitaaffii pillugit ilisimatuup, Gudmundur Alfredssonip aviisimut Information-imut ullumi oqarnera, Naalakkersuisut siulittaasuata, Aleqa Hammondip isumaqatigilluinnarpaa, oqarluni Danmarkip nunanut tamalaanut isumaqatigiissutaat malinneqarpata tamanna Danmarkimit akuleruffigineqartariaqanngitsoq.
Allattoq Apollo Jeremiassen
oktobarip 16-at 2013 15:28

- Aatsitassaasinnaasut suugaluartulluunniit Nunatta sananeqaataanut attuumassuteqartut inuiaat kalaallit tamakkununnga piginnittuupput akisussaaffillu tamakkiisoq tigummillugu.

Sutigulli Danmarki akulerutissanersoq, Aleqa Hammindip suli akisinnaannginnerarpaa oqarluni Inatsisartuni uranimut tunngasoq suli naammassineqanngimmat tamanna akisinnaanngikkallarlugu.

Danmarkilli Kalaallit Nunaatalu isumaqatigiissutaat, Aleqa Hammondip ima oqaatigai.

- Aatsitassarsiornermut tunngatillugu illersornissamut sillimaniarnermullu apeqqutinik naliliisoqartillugu Danmarki suleqatigiissuteqarusuppoq, taamaalilluni Danmarkip qulakkiissavaa nunat tamalaat isumaqatigiissutaannik Danmarki unioqqutitsissannginnera. Aamma isumaqatigiissutigaarput Nunatta aatsitassarsiornerani apeqqutini mianernartuni suleqatigiinnissarput.

Aleqa Hammondip naqissuserpaa, Danmarki Nunatsinni pissutsinut akulerutissappat, tamanna kalaallit namminneerlutik qaqugu pissanersoq aalajangissarimmassuk, ingammik urani aatsitassallu allat pineqartillugit.

Danmarkilli akulerukkusunnera Aleqa Hammondip paasisinnaanerarpaa, oqarluni Qallunaat naalakkersuisui akulerukkusunnatik oqarsimasuuppata tamanna tupigissagluarlugu.

- Nunatta niuersinnaassuseqarnera kalaallit namminneerluta akisussaaffigaarput kiffaanngissuseqarfigalugulu. Kisianni illersornissamut sillimaniarnermullu apeqqutini Danmarkip tamkkununnga sunniuteqaqataarusunnini takutippaa. Tamanna tikilluaqqugaarparput suleqatigiissutigissallutigulu. Naalagaaffeqatigiinnerpullu eqqarsaatigalugu illuatungeriit peqataaffigisinnaasaanik qanoq iliuuseqarnissarput isumaqatigiissutigissallutigu pingaaruteqarpoq.

Aleqa Hammondip aamma naqissuserpaa, Nunatta uranimik tunisassiorsinnaalernissamik pilersaaruteqarnerani Danmarki tamassumunnga naaggaarsinnaatitaanera oqallinnermi pineqanngimmat, suleqatigiinnissarli pineqartoq oqaatigalugu.

- Kisianni Danmarki Nunatta ineriartornissaanut tukimmersorsinnaanngilaq, tassami tamanna inuiaqatigiit kalaallit inatsisitigut tunngavissaqarlutik akisussaaffigaat.

Naalakkersuisut siulittaasuat, Aleqa Hammondip ilanngullugu oqaatigaa, Nunarput suliffissuarnik pisariaqartitsisoq Danmarkimit isumaqatigineqarmat aamma oqaatigalugu Namminersornermut Inatsit aamma Aatsitassanut Inatsit Kalaallit Nunaata akisussaaffigigai Danmarkimit paasilluarneqarsimasoq. Aleqa Hammondip aamma oqaatigaa, oqartussaaffiit Danmarkimit suli akisussaaffigineqartut suleqatigiinnikkut tamakku iluarsineqartassasut isumaqatigiissutaammat.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq