Aleqa: Uran Nunatta aningaasarsiornikkut iluaqutissaraa

Naalakkersusiut siulittaasuata taama oqarnera Inatsisartuni illuatungiliuttunit aamma aatsitassat pillugit ataatsimiisitaliami Siumut sinnerlugu ilaasortaanit, Doris Jakobsenimit toqqissisimatitsiunnaaraluarpoq.

Aatsitassanik uranitalinnik avammut annissuinissamik naameerluinnarnerup atorunnaarsinneqarnissaa, Inatsisartuni sisamanngormat oqallisigineqarnerata kingorna Inatsisartut aalajangerput, Inatsisartuni aappassaanik oqallisiginnginerani, tamanna aatsitassat pillugit ataatsimiisitaliami oqallisigineqaqqaassasoq.

Taama aalajangiinerup kingorna, Naalakkersusiut siuliuttaasuat, Aleqa Hammond Islandimi Issittoq pillugu politikkikkut oqalliffimmi nutaami, Arctic Circlemi ammaanersiorlutik oqalugiaqattaartoqarnerani, urani Nunatta aningaasatigut imminut napitilersinnaaneranut aqqutissaasumik oqarnera, Sara Olsvigip, Inuit Ataqatigiit, eqqarsarnartoqartippaa isornartorsiorlugulu.

Isornartorsiummut tamatumunnga, Naalakkersuisut siulittaasua, Aleqa Hammond ima erseqqissaateqarpoq.

- Oqalugiarninni pingaaruteqartut marluk eqqartorpakka. Siullertut, silaannaap aallanngoriartornerata ilutigisaanik, Nunatta aningaasarsiorsinnaanera periarfissinneqartoq. Aappaattut oqaatigaara, Nunatta periarfissai ammaanneqartariaqartut, soorlu uranitalinnik piiaaqqusinngilluinnarnerup atorunnaarsinneqarnissaanik oqallisigineqarnerata nassatarissammagu soorlu Nunatsinni suugaluartunilluunniit aatsitassarsiorsinnaanerup ammaanneqarnissaa, tassa taakku eqqartukkakka.

Aleqa Hammond aamma isumaqarpoq Sara Olsvigip allatut paasinninnera erseqqissaassutigissallugu pisariaqartoq, imalu oqarluni.

- Pingaartorujussuuvoq Nunatta aningaasarsiorfissaannik aqqutissiuussinissaq. Tamannalu aporfeqassappat politikkikkut suliassaraarput, Nunatta inuisalu soqutigisai pingaartillugit immunut napatissinnaanerup aqqutissiuunnerani aporfinnik piiaassalluta. Tassa tamanna siunertarput. Uranimut oqallinnermut atatillugu oqatigisariaqarpara, uranimik piiaanissamut akuersissutinik suliaqannginnatta qinnuteqaatinillu suli tigusaqarsimanata, Aleqa Hammond oqarpoq.

Aatsitassat pillugit Inatsisartut ataatsimiisitaliaani Siumut sinnerluugu ilaasortap, Doris Jakobsenip, Naalakkersuisut siulittaasuat isumaqatigigaluarlugu, radioaviisimut oqaatigaa, nammineq isummani naapertorlugu nunatta aningaasatigut imminut napatilersinnaaneranut uranip tunisassiarineqarnera kisiat isumalluutiginagu, aatsitassat naliginnaasut uranimik akoqanngitsut iluanaarutaasinnaaneri aamma aqqutissaagaluarmata.

Tamanna pillugu Naalakkersuisut siulittaasuat ima oqarpoq.

- Oqalugiarninni pissusissamisoorsoraara Nunatta pisuussutaat ilanngullugit eqqartussallugit. Isumaqarpungalu nunanut suleqatigisatsinnut oqariartuutigissagipput erseqqissaassutigalugulu, Nunatta periarfissiissutaat aamma politikkikkut tamassuma oqallisigineqarnera sumut killinnersoq.

Nalakkersuisut siulittaasuat, Aleqa Hammond Islandimiittoq taama oqarpoq.