Aleqa: Tunngaviusumik inatsiseqalernikkut kaanngarnavianngilagut
Pingaarnertut qulaakkeerniarneqarpoq nunap nammineq pingaartitai tunngavigalugit pisinnaatitaaffiit qulakkeerneqarnissaat, Siumut taama isumaqarpoq Inuit Ataqatigiillu ilalerlugit sapaatip akunnera tulleq Naalakkersuisut peqquniarpaat tunngaviusumik inatsiseqalernissaq anguniarlugu suleqatigiissitaliortoqassasoq.
- Tunngaviusumik inatsiseqalernissamut suleqatigiissitamik pilersitsisoqarpat namminiilivinnissamut annertuumik alloriartoqartussaavoq, tassanili toqqaannartumik tamanna piumasaqaataassanngilaq, illuatungiliuttut siulittaasuat Aleqa Hammond oqarpoq. Naalakkersuisooqatigiinnilu siulittaasoqataata Kuupik Kleistip tamanna ilalernartuutippaa.
Siumup siuttuata pissusissamisoorsoraa maanna Namminersorneq anguneqareerpat pingaartitat aalajangersornissaat taakkuussammata kalaallit inuiaat ilisarnataannut takussutissat aammalu Nunatta namminiilivikkiartorneranut takutissaq.
- Tullianilli alloriartigata pingaaruteqarluinnarpoq uagut inuiattut suli sanarfineqartutut, nammineq tunngaviusumik inatsisissatta piareersarnissaa inuiattut pingaartitavut tassani takuneqarsinnaassammata. Tunngaviusumik inatsisitsinni takuneqarsinnaassapput kulturerput inuiattullu ileqquvut, taakkuussammatami inuiaassutitsinnik illersuisussat, Aleqa Hammond oqarpoq.
Taanna aamma Siumup Inatsisartuni gruppea Naalakkersuisunut kaammattuuteqarput tunngaviusumik inatsisissaq qulakkeerinnittuussasoq innuttaaqataasutut, politikkikkut, aningaasarsiornikkut, isumaginninnikkut kulturikkullu pisinnaatitaaffinnik.
- Inuit ilaatigut pisinnaatitaaffigissavaat piniariarsinnaaneq, aalisariarsinnaaneq arfanniarsinnaanerlu. Inuiattut tamakku ilisarnaatigaavut issittumi inuusinnaanitsinnik qulakkeerisut tamakkulu tunngaviusumik inatsisissatsinni takuneqarsinnaasariaqarput, Aleqa Hammond oqarpoq.
Siumukkut Inuit Ataqatigiit assigalugit piumasaqarput isumalioqatigiissitassap sapinngisamik innuttaasut nuna tamakkerlugu peqataatissagai tunngaviusumik inatsisissamik siunnersuusiornermi.
Tunngaviusumik inatsiseqalernissamik piareersaalluni isumalioqatigiissitaq Siumukkut naatsorsuinerat malillugu 15 millioner koruuninik aningaasaliiffigineqassaaq, taamatummi Namminersorneq pillugu isumalioqatigiissitaq aningaasaliiffigineqarnikuummat.
Aleqa Hammondip aamma naatsorsuutigaa suliaq aallartippat oqallittoqalerpallu kalaallisut kinaassuseq nukittorsarneqarumaartoq taamaasillunilu nunatsinnik sanarfeqataalluni.
- Suliap ingerlanera inuiannik uisitsiumaarpoq. Nammineq isitsinnik assigiinngitsut takusinnaalissavagut isumaqarluinnarpungalu tamanna inuiaqatigiinnut peqqinnartuusoq, Aleqa Hammond oqarpoq.
Inuit Ataqatigiit Siumukkut assigalugit kajumissaarutigaat tunngaviusumik inatsiseqalernissamik suliaq aallartittariaqartoq. Nunatsinni partiit anginerit marluk imminnut assingusunik siunnersuuteqarput taakkulu sapaatip akunnera tulleq Inatsisartuni oqaluuserineqassapput.
