Aleqa: Sulisunut tunngasut oqaaseqarfigerusunngittuarsinnarpai
![](/sites/default/files/styles/image_934x467/public/article_images/aleqa_hammond_110907_04_0.jpg?itok=4zkqZwqK)
Naalakkersuisullu siulittaasuat Aleqa Hammond piffissami sivitsortumi iliuuseqanngereerluni maanna qisuariaateqarpoq.
Aleqa Hammondip qisuariaatimini qulequtaraa:
Inatsisit malillugit Naalakkersuisut sulipput.
Inunnut ataasiakkaanut tunngasut pillugit tusagassiuutit piffissami qaangiuttumi samminninnerat pillugu pingaartippara erseqqissaatigissallugu Naalakkersuisut suliaminni tamani allaavigimmatigit maleruagassat, periaatsit inatsisillu atuuttut.
Nunap inatsisai allatuulli soorunami Naalakkersuisut malitassarivaat.
Inuit ataasiakkaat, sulisorisat ataasiakkaat sulisuusimasulluunniit pillugit Naalakkersuisut oqaaseqarneq ajorput. Taamaappoq inuit ataasiakkaat Namminersorlutillu Oqartussat ataqqineqarnissaat pissutigalugu.
Nunap siuttui politikkikkut sulineq qitiutillugu sulipput siunertaralugu nunami maani innuttaasut tamarmik atugaasa pitsanngorsarneqarnissaat.
Taamaattumik manna aqqutigalugu erseqqissaatigissavara inuit ataasiakkaat pillugit suliat tusagassiuutit aqqutigalugit eqqartornissaat kissaatiginnginnakku.