Aleqa: Siulittaasunik inuusuttunik ivertitsinermut aalajangiinermi isornartorsiutit tunngavissaqanngillat

- Siulersuisuni ilaasortanik taarsersuissalluta aalajangernerput, sulianik nilersuinermik tunngaveqarpoq. Taamaattumik siulersuisuni ilaasortat piginnaasaqarnerat, ukiui pinnagit toqqarneqarput. Siulersuisuni siulittaasuusimasut sulisimanerat qujamasuutigaarput. Tamannali oqaatigereerlugu aamma isumarput tassaavoq, maannakkut nukiit nutaat qanoq naleqarnerminnik takutitsinissaannut piffissanngormat, Aleqa Hammond oqarpoq.

Siulittaasunngortussalli suliassaminnut qanoq piukkunnaateqartigineri mannamut erseqqarissumik suli oqaatigineqanngilaq.

Siulersuisussanik toqqaaniarnermi, Ingerlatseqatigiiffinnut Allattoqarfimmit kikkut piukkunnarnerunersut nalilersorneqartarput. Taakkuli aalajangigaat tamanut saqqummiunneqarneq ajorlutik aamma aalajangiinerit politikerinit malinneqartarnersut kikkunnulluunniit tusarliunneqarneq ajorlutik.

Tamassumunnga tunngatillugu Radioaviisimit paasiniaasimagaluarnerput assersuutissaalluarpoq, tassa Royal Arctic Line-mi aamma KNI-mi siulittaasussatut Naalakkersuisunit toqqarneqartut, Ingerlatseqatigiiffinnut Allattoqarfimmit toqqagaasimanersut paasiniaraluaratsigu akineqarsinnaasimannginnerput.

Paasiniaanerpulli suli ingerlapparput, tassa Naalakkersuisut siulittaasuat, Aleqa Hammond, maanna nunanut allanut tikeraartoq pissarsiariniarlutigu.

Siulersuisunili siulittaasut inuusuttut nutaat, siulersuisunilu sulinermik misilittagaqanngitsut ivertinneqarneri, ataatsimut isigalugu misiliigaluarnerusoq, Copenhagen Business School-imi professori aamma siulersuisut katitigaanerat pillugu ilisimasalik, Flemming Poulfelt oqarpoq.

- Siulersuisuni sulineq imaaliinnarlugu suliassaanngitsoq eqqarsaatigalugu, misilittagaqanngitsunik ivertitsineq unammillernartuuvoq annertooq. Tassami suliassaq pingaaruteqarluarpoq iluamillu suliassaalluni. Soorunami siulittaasunngortut pikkorissuusinnaapput aamma siulittaasutut sulinermut pikkorissuusinnaallutik. Taamaattumik oqartariaqarpunga, suliffeqarfiit amerlanerpaartaat misilittagaqanngitsunik siulittaasunngortitsinissaminnut tunuarsimaartarmata.

Copenhagen Business School-imi professori aamma siulersuisut katitigaanerat pillugu ilisimasalik, Flemming Poulfelt oqarpoq.