Aleqa siulittaasoq arnaq

Martsip 26-anni ullaatungaa nalunaaqutaq aqqanermut avammut nalunaarutigineqarpoq, Aleqa Hammond Naalakkersuisut siulittaasunngussasoq aamma Nunanut allanut pissutsinut naalakkersuisunngussasoq.

-Ane Maaliap Uummannarmiup panigivaanga, Ane Maaliap Uummannarmiup perorsarpaanga pissakitsuulluta aamma pissakitsuulluta perorsarneqarnitsinni immitsinnut akaareqartigiilluta ikioqatigiinnissamut anersaaqartumik perorsarneqarpunga.

Taama oqarpoq Uummannami meeraanerminit peroriartorsimasoq, Naalakkersuisut siulittaasuat Aleqa Hammond, Inatsisartunut qineqqusaarnermi, immaqa Siumumut aalajangiinerpaami, KNR-TV-kkut aallakaatinneqartumi, februaarip 26-anni, taamani naalakkersuisut siulittaasuat, Kuupik V. Kleist aapparalugu oqallitsinneqarnerminni.

Aleqa Hammond inunngorpoq Narsami septembarip 23-anni 1965-mi, tamatuma kingorna Uummannamut nuupput. Aleqa Hammond suli meeraasoq angutaa, Piitaaraq Johansen toqukkut qimaguppoq, tassalu arnaata, Aani Maalia Johansenip aappaarunnermi kingorna meeqqani kisimiilluni perorsalerlugit.

Aleqa Hammond Uummannamiit 15-nik ukioqarluni aallarpoq, nunat allat misigisassarsiorfiginiarlugit.

Politikkikkut pimoorussilluni sulilerpoq 2005-mi, Inatsisartunut qinigaanermi kingorna, tassalu Ilaqutariinnermut Inatsiseqarnermullu naalakkersuisunngorluni, sivikitsumilli.

Siumup nuna tamakkerlugu 2007-mi ataatsimeersuarnerani siulittaasunngorniunnermut peqataavoq, siulittaasunngunngitsoorlunili, aatsaalli Inatsisartunut qinersinerup kingorna 2009-mi Siumup ajorsartitaanerani, taamani siulittaasuusup, Hans Enoksenip Siumumi siulittaasutut tunuarnerata kingorna, Aleqa Hammond siulittaasunngorpoq.

Siumut Inatsisartuni ukiut sisamat illuatungiliuttooreerlutik, martsip aqqaneq aappaanni Inatsisartunut qinersimi ajugaarujussuartutut oqaatigineqarsinnaasup kingorna, tassa Nunarput siullermeersumik arnamik naalakkersuisut siulittaasoqalerput.

Aleqa Hammondip nunat allamiutut oqaatsit arlallit piginnaasaqarfigai.