Aleqa: Sinneri Niels Thomsenip nalilerumaarpai
KNI-mi piffissami kingullermi pisut pillugit arlaatigut kinguneqartitsisoqassanersoq, Atassutip paragraf 37 naapertorlugu apeqquteqaatigaa. Claus Jensenip soraarsitaanerata kingorna pisortat atorfilittallu allat aamma tunuarniuteqarput.
Pisortaanerusimasumulli nalilersuinissaq aalajangiinissarlu Naalakkersuisut suliassarinngikkaat, Naalakkersuisut siulittaasuata Aleqa Hammondip oqaatigaa.
KNI-mi siulersuisuni siulittaasuusimasup Michael Skourupip suliffeqarfimmut pisussaaffimminik sumiginnaasimanerannut Naalakkersuisut akisussaaffiliinissamik pilersaaruteqarnersut, Atassutip aamma apeqquteqaatigaa, Michael Skourupili tassunga atatillugu annilaanngassutissaqanngilaq, Naalakkersuisumi tassunga atatillugu ima akipput:
- Siusinnerusukkut siulersuisut siulittaasuat eqqarsaatigalugu Naalakkersuisut nalilerpaat, akisussaaffiliinissamut uppernarsaatissat naammanngitsut, Aleqa Hammond ilaatigut allappoq.
KNI-p siulersuisuini ilaasortat pingasut, pisortaanerup Claus Jensenip soraarsitaanerata kingorna tunuartut pingasut taartissaat naleqquttut nassaariniarlugit Naalakkersuisut maanna suliniuteqaleruttortut, taassuma aamma oqaatigaa.
Siulersuisuni ilaasortaasussatut piukkunnaateqartut Naalakkersuisut siulittaasuannut tamatigut kaffisoriartoqquneqartartut erseqqissaatigineqarpoq, ingerlatseqatigiiffimmillu aqutsilluarneq najoqqutassallu allat tassani nassuiarneqartarnerat ilisimatitsissutigineqarluni.
