Aleqa siammasissumik suleqateqarusuppoq
- Naalakkersuisoqatigiinngikkaluarluta ataatsimiititaliani assigiinngitsuni, teknikkikkut ataatsimiiffissarsiornermi nukikka atorsimavakka. Isumaqarpungalu taama neqerooruteqarneq tigulluarneqartoq aamma suleqatigiissutissagut neriulluarnarput.
Demokraatit teknikkikkut suleqatigilernerini, Inatsisartuni siammasinnerusumik suleqatigiissinnaaneq anguniagaasoq aamma partiit amerlanerit anguniakkanut peqataanissaat pingaartinneqarsimasoq, Aleqa Hammondip oqaatigaa.
- Tassa isumaqarama, Naalakkesuisoqatigiit avataani siammasinnerusumik suleqatigiittoqarnissaa aammaallugu. Taamaattumillu Demokraatit neqeroorfigaakka, teknikkikkut suleqatiginissaannik periarfissiillunga, tamassuma saniatigut ataatsimiititaliani ilaasortaaffissaannik neqeroorfigalugit, isumaqarama tamassuma aqqutissiuutissgaa, Inatsisartuni siammasinnerusumik suleqatigiissinnaaneq anguneqassasoq aamma Naalakkersuisoqatiginngikkaluarlugit allatut suleqatigiissinnaaneq ammaakkusukkakku, Aleqa Hammond oqarpoq.
Inatsisartunut upernaaq qineqqusaarnerup nalaani aammalumi nutaanik Naalakkersunngortitsinerup kingorna, Demokraatit Siumukkormiunut annertuumik isornartorsiuisartut ilisimaneqarpoq. Demokraatit Siumukkormiunik isornartorsiuisarnitik attatiinnarsinnaagaat, Aleqa Hammondip oqaatigaa.
- Isumaqarpunga Demokraatit Siumukkunnit allaanerusumik suleriuseqartut aamma taamaasiorsinnaassuseqarput tamannalu apeqquseratigu. Tekinikkikkut suleqatiserinerini nalilersunngilara uangutsinnut qanoq pissusilersortarnersut aallaavigaluguli pitsaasumik qanoq suleqatigiissinnaanerput, Naalakkersuisut siulittaasuat, Aleqa Hammond oqarpoq.
Inatsisartuni Inuit Ataqatigiit gruppe-ata siulittaasuat, Agathe Fontain tusagassiutinut nalunaarummini allappoq, Inatsisartuni Inuit Ataqatigiit kisiartaallutik illuatungiliuttunngortut tamannalu nassuerutigalugu.
- Inuit Ataqatigiinni politikkerput isumaliortaaserpullu aallaavigalugu Inatsisartuni partiinik suleqateqarnerput sunniutilimmik nangissavarput, Agathe Fontain allappoq.
Inuit Ataqatigiit kisimiilerlutik illuatungiliuttunngornermik tusagassiutinut nalunaaruteqarnerat, Demokraatit siulittaasuata, Jens B. Fredriksenip isumaqatiginagu KNR-ip nittartagaatigut allaaserisaqarpoq, oqarluni Demokraatit illuatungiliuttutut imminnut suli isigigamik.
- Naalakkersuisoqatigiinnut teknikkikkut suleqatigiinnissamik isumaqatigiippugut, soorlu Inuit Ataqatigiit ippassaq tikillugu teknikkikkut suleqatigigivut taakkununnga tunuliaqutaanngikkaluarluta.
Jens B. Fredriksenip tusagiasaarerpasissumik allakkani ima nangippai.
- Inuit Ataqatigiit teknikkikkut suleqatiginerinut naleqqiullugu, Demokraatit maanna sunniuteqarnerulerput, tassami ataatsimiititaliani amerlanernik maanna ilaasortaaffeqalerpugut, ilissi, tassa Inuit Ataqatigiit, suleqatiginssinnut naleqqiullugu.
Jens B. Fredriksen allappoq naqissuserlugulu oqaatigalugu, Inuit Ataqatigiit paasisariaqaraat Naalakkersuisoqatigiinnut ilaasortanngunnginnamik aamma Inatisartuni amerlanerussusiliinnginnamik.
