Aleqa Randimut: Siumunngorusuppit?

Naalakkersuisoqatigiinnut tatiginninneq mikereertigisoq, suli milliallaqqittoq, Partii Inuit siulittaasuata Nikku Olsenip oqaatigaa imalu nangilluni.

- Taamatut Aleqa Hammondip iliuuseqarnera tupigusuutigaara nakeriallaatigalugulu. Tamannalu tusarakku, erngerlunga Aleqa Hammond unneqqarissumik allaffigaara, tatigeqatigiinnermik annertuumik tamanna innarliimmat, Nikku Olsen oqarpoq.

Inatsisartunut siorna qinersinermi Partii Inuit qinerneqarluarnermi kinguneranik, Inatsisartunut ilaasortaalerput Randi Broberg aamma Nikku Olsen. Qinerneqarluarnerli allamut saatinneqarpoq, tassa Partii Inuit siulittaasuata Inatsisartuni ilaasortaasinnaannera apeqquserneqarluni, Nikku Olsen ilaasortaasinnaajunnaarmat. Tamatumalu kinguneranik Partii Inuit sinnerlugit qineqqusaartoq, Lars Mathæussen ilaasortanngoraluarluni. Taannali ullut arlaqanngitsut qaangiutiinnartut aalajangerpoq, Siumumut nuunniarluni.

Taamaalilluni Randi Broberg kisimiilluni Partii Inuit sinnerlugit Inatsisartunut ilaasortaalerpoq, ataatsimiititaliamilu pingaaruteqartuni, Kultur-eqarnermut ataatsimiititaliami siulittaasunngorluni, tassaniillunilu Partii Inuit naalakkersuisoqatigiinnit suleqateqarunaarnissartik tikillugu, tassa siorna oktobarimi.

Naalakkersuisut siulittaasuata taamatullu Siumup siulittaasuata, Aleqa Hammondip isertuutinngilaa, Randi broberg aperisimallugu. Tamannalu pillugu Aleqa Hammond ima oqaaseqarpoq.

- Partii Inuit naalakkersuisooqatigiunnaareeraluarlugit taamatullu teknikkikkut suleqatiginngikkaluarlugit, kultureqarnermut ataatsimiititaliami, Randi Broberg ilaasortatipparput, tamassuma takutippaa Randi Brobergimit suleqateqarnerput ajunngitsumik pisoq. Pisoq inummut attuumassuteqarmat allamik oqaaseqarsinnaanngilanga.

Naalakkersuisut siulittaasuat Aleqa Hammond taama oqarpoq. Pisoq pillugu Randi Broberg oqaaseqartinniaraluarparput tamannali pisinnaanngilaq taanna Alaskami Fairbanks-iittoq attaveqarfigisinnaannginnatsigu.