Aleqa oqalliffimmi: Inuiaat katersuutsippagut

Naalakkersuisuni siulittaasup, Aleqa Hammondip Inuit Ataqatigiinneersup Aqqaluaq B. Egedep ukiumi qaangiutilersumi pisut pingaarnersaat unnugu TV-kut Oqalliffimmi oqallisigissavaat.

Uranimut naaggaarluinnarnerup atorunnaarsinneqarnera oqallisaalluaqaaq.

- Uagut Qoornormut toqqorluta isumaqatigiinnaveersaarniarluta aalianginngilagut. Inuiaqatigiinnut oqarpugut, inuiaqatigiinnut sassaalliutigivarput, qinigassanngortippugut uranimut naaggaarluinnarnerup atorunnaarsinneqarnissaa siunnerfigalutigu. Oqallinnermit pingaarnerit ilagivaat. Taamaattumik oqartoqassanngilaq innuttaasut oqariartorfigisimanatigit. Innuttaasut nalunngilaat siunnerfigut suunersut. Qitiusorujussuuvoq oqallinnermut. Aamma tunuliaqqutsiineq ataqqisassaavoq, Aleqa Hammond oqarpoq.

Aammali Naalakkersuisooqatigiit innuttaasunik peqataatitsinissamut pikkorliortartut, Aqqaluaq B. Egede isumaqarpoq.

- Pissutsit nalaatagut imaatut ingerlapput, akerliusut akerliussutsitsimmik takutitsigaangamik piffissaq kingulleq anillaffigineqarnerluunniit ajorput. Kisianni tapersersuisut ilagineqartarlutik. Taamatut ingerlatsineq isumaqatiginngilara. Aamma erseqqissarusuppara, qanoq aaliangiinerluta oqallisigeqqaartariaqarparput kisiat taanna pinngilaq. Taannaana uagut ujartugarput. Oqallittariaqarpugut aamma ilisimaqqissaartariaqarparput suna aaliangiiffigilernerlugu.

Oqalliffik tamaat unnugu KNR tv-kkut kalaallisut 19:30 aallakaatinneqassaaq, qallunaatut 20:00 aallakaatinneqassalluni.