Aleqa nunatsinnut angalaqataaniarunnaartoq
Siumup Folketingimi allaffeqarfiata tamanna KNR-imut uppernarsarpaa.
Politikerip Siumumit ilaasortaajunnaarsinneqartup Folketingip Kalaallit Nunaannut tunngasunut ataatsimiititaliaani siulittaasup tulliatut Nunatsinnut angalaneq siuttuuffigisussaagaluarpaa.
Ataatsimiititaliami siulittaasup Venstremeersup Marcus Knuthip Folketingip akuulersitsiniarnermut ataatsimiititaliaata allamut paasisassarsiorluni angalaneranut peqataanissaa pissutigalugu nunatsinnut angalaneq Hammondip siuttuuffigisussaagaluarpaa.
Aamma atuaruk Socialdemokraatit Aleqa Hammond suleqatigiunnaaraat
Politikerilli Folketingimit kreditkorterisaminik atuisimanerata ulluni kingullerni oqallisaasupilussuunera pissutigalugu, Aleqa Hammond peqataaniarnani aalajangersimavoq. Pisoq pissutigalugu Siumumit ippassaq ilaasortaajunnaarsinneqarpoq Socialdemokraatillu Hammondimik suleqateqarnertik atorunnaarsillugu.
Taarsiullugu ataatsimiititaliap angalannissaa Inuit Ataqatigiit folketingimut ilaasortaatitaannit Aaja Chemnitz Larsenimit siuttuuffigineqassaaq.
Aleqa Hammondip Folketingip Kalaallit Nunaannut tunngasunut ataatsimiititaliaani siulittaasup tulliatut inissisimanini ataatsimiititalianilu allani pingasuni ilaasortaaffeqarnini attatiinnassanerai Folketingimi oktobarimi ataatsimiittoqalerpat aalajangiiffigineqassaaq.
Aamma atuaruk PISUT Kreditkortimik atuineq pillugu allaaserisat tamaasa