Aleqa: Nunatsinnut ajunngilluinnarpoq

Siumut aamma Socialdemokraatit qinersinissaq sioqqullugu suleqatigiinnissamik isumaqatigiissusiorput. Taamaammat Siumukkormiut nuannapput paasinarsimmat Danmarkimi statsministeri tulleq tassaassasoq Helle Thorning Schmidt.

- Statsministerertaartussanngorpugut Kalaallit Nunaannut soqutiginnittumik aammalu toqqaannartumik kalaallit partiiannik suleqateqartumik. Taamaattumik isumaqarpunga Danmarkimi qinersinerup inernera Kalaallit Nunaannut ajunngilluinnartoq, Aleqa Hammond KNR.gl-imut oqarpoq.

Saamerliit 89-nik qinigaatitaqarput talerperliit 86-nik qinigaatitaqartut. Maanna utaqqiinnarneqalerput Kalaallit Nunaanni aamma Savalimmiuni qinersinerup inerneri. Isumasiuineq kingulleq naapertussagaanni ilimanarsinnaalluarpoq Siumup aamma Inuit Ataqatigiit ilaasortaatitaqarnertik tigummiinnassagaat.

- Sulissutigaarput sapinngisamik annerpaamik sunniuteqarnissarput naalakkersuinngortussat qanimut suleqatigalugit. Taamaattumik Danmarkimi qinersinerup inernera assut nuannaarutigaarput, Aleqa Hammond qinersinerup unnukkuanik malinnaanissaminut piareersartoq oqarpoq.

Taasinerit kisinneqarneri malinnaaffigisinnaavatit KNRip nittartagaani aamma tekst tv-mi.