Aleqa namminersuussilluni aalajangiisimavoq

Ataatsimiititaliami siulittaasoq, Per Berthelsen, suliami matumani sallunaveeqqutitut tigusaasutut misigisimaalluni oqarpoq, aamma ataatsimiititaliap aalajangeeqataasimannginnera naqissuserpaa.

Pingaartumik oqaluuserineqarsimaneranik oqartoqarnera Per Berthelsenip isumaqatiginngilaa.

- Eqqartunngilarput, eqqartuisimanitsinnimmi oqartoqarnera ataatsimiititaliap aalajangeeqataasimaneranik avataanit paasineqarsinnaavoq, uagullu aalajangeeqataanngilagut, Per Berthelsen oqarpoq.

Ataatsimiititaliami ilaasortat sinneri peqatigalugit oqaaseqaateqassanerlutik ataatsimiititaliap allattaa attaveqarfiginiarpaa, ataatsimiititaliap ilisimatinneqaannarsimanera akuliusimannginneralu naqissuserniarlugu.

Per Berthelsenip suliap taamatut pisoqarsimanera uggoraa, ataatsimiititaliammi taamatut pisoqarnissaa kissaatiginngilluinnarsimammagu.

Ataatsimiititaliaq suliamut tunngatillugu qanoq isumaqarpa?

- Taamatut pisoqarsimanera ajuusaarnartutut isigaarput, naalakkersuisutigoortumik Naalagaaffeqatigiillu iluani suliap qaqinneqarnissaa soorunami kissaatigaarput. Aaqqiissutissamillu naammaginartumik nassaartoqarnissaa ilungersuutigalugu.

Anders Olsen, Siumut, ataatsimiititaliami aamma ilaasortaasoq Radioaviisimit aamma oqaloqatigaarput. Naalakkersuisut Issittumi Siunnersuisooqatigiit ataatsimiinnerannut peqataaniaratik pilersaarnerinik, aaqqiissutissamillu nassaartoqarnissaanik neriuuteqartoqarneranik ataatsimiititaliap maajip tallimaani ilisimatinneqarsimanera ilumoornerarpaa. Aalajangiineq ataatsimiinnermi eqqartorneqarsimanngitsoq aamma oqaluttuarpoq.

Aleqa Hammondip saniatigut kikkut aalajangiinermut Nunatsinnut pingaarutilimmut peqataasimanersut radioaviisip paasiniaanermini paasisinnaasimanngilaa.

Ullup ilaa ilaatigut oqaluttuaraarput assersuutigalugu Atassutip siulittaasua Gerhardt Petersen aalajangiinermi peqataatinneqarsimanngitsoq.

Partii Inuit siulittaasuat Nikku peqatigalugu Aleqa Hammondimik tallimanngormat ataatsimeeqateqarpoq, tassanilu allaanerulluinnartumik aalajangiisoqarpoq.

Qanoq ilillusi peqataannginnissamik aalajangiivisi?

- Tallimanngormat ataatsimeeqatigiikkatta eqqartorparput, peqataannginnissarli aalajangiiffigineqanngilaq, aamma oqaloqatigiinnerit ingerlammata peqataanissaq isumaqatigiiassutigaarput, Gerhardt Petersen oqarpoq.

Nikku Olsen aamma aalajangeeqataasimanngilaq, taannalu Sermitsiaq.AG-mut ima oqarpoq:

- Aleqa Hammondip Issittumi Siunnersuisooqatigiinni peqataanissaa pillugu tallimanngormat ataatsimiinnermi ilisimatinneqarpugut. Aleqa Hammondimit itinerusumik nassuiaateqarfigineqarnissarput naatsorsuutigaarput, Partii Inuit siulittaasuat, Nikku Olsen, Sermitsiaq.AG-mut oqarpoq.

Nikku Olsenip, Miiti Lyngep, Randi Brobergip Lars Mathæussenillu suliami peqataasimanersut qanorlu isumaqarfigineraat paasiniarlugu oqaaseqartinniarlugit ulloq tamaat pissarsiarisinnaasimanngilagut. Poul Egedeli Partii Inuineersoq oqaluttuarpoq Naalakkersuisut siulittaasuata aalajangersimanera partiimit taperserneqartoq.

Naalakkersuisut siulittaasuata tullia, Sten Lynge, Atassut, aamma aalajangeeqataasimanngilaq, saaffiginnissutitsinnullu akissutitut allappoq Siulittaasup aalajangiinerigaa.

- Aleqap Siunnersuisooqatigiit ataatsimiinnerinut peqataaniarani aalajangernera tusaatissatut tiguara. Tamatuma saniatigut suliaq oqaaseqarfigeqqikkusunngilaa, tamannami Aleqap akisussaaffeqarfiata, tassalu nunanut allanut tunngasut, ataaniimmat, Steen Lynge Atassummeersoq oqarpoq.