Aleqa: Naalakkersuisut tamarmiusut taperserpaannga
- Taama aalajangertussanngorama Naalakkersuisunit tamarmiusunit taperserneqarpunga aamma ataatsimiititaliaq susassaqartoq, tassa Nunanut allanut Sillimaniarnermullu ataatsimiititaliaq ilisimatippakka Nunatta inissisimanera pillugu, Aleqa Hammond taama oqarpoq.
Issittumi Siunnersuisoqatigiit ataatsimiinnissaannut Nunarput peqataassasoq, Naalakkersuisooqatigiit Ataqatigiissaarineq pillugu ataatsimiititaliaata, Nunarput peqataassasoq maajip pingajuanni aalajangerpaat. Ataatsimiititaliami tassani ilaasortaapput, Naalakkersuisooqatigiinni partiit siulittaasui tamarmik, tassaasut Nikku Olsen Partii Inuit, Gerhardt Petersen Atassut aamma Aleqa Hammond Siumut.
- Piffissaq kingulleq atorlugu aalajangerpunga ataatsimiinnermut peqataaniarnanga. Tamatumunnga pissutaavoq, Nunatta 2011-miilli toqqaannartumik isumaqatigiinniarnerni issiaveerunneqarnera akuersaannginnatsigu.
Aleqa Hammondip Issittumi Siunnersuisoqatigiit nunat ilaasortaasa ministeriisa ataatsimiinnerannut takkutinnginnera, Naalakkersuisut siulittaasorisimasaata, Kuupik V. Kleistip ilaatigut ima isornartorsiorpaa.
- Aalajangerneq taamaattoq annertoorujussuuvoq annertuumillu kinguneqarsinnaalluni, taamaammat isumaqarpunga peqataannginniarnermik aalajangerneq Naalakkersuisut siulittaasuata kisimiilluni aalajangersinnaanngikkaa. Tassami Issittumi Siunnersuisoqatigiinnut peqataanissaq inuiaqatigiinnut tamanut pingaaruteqarluinnarpoq, Kuupik V. Kleist oqarpoq.
Aleqa Hammondip ataatsimiinnermut peqataannginnerminut pissutaaqataatinnerarpaa, isumaqatigiinniarnerni issitoq pineqartillugu Nunarput issiavimmik tunineqanngimmat.
- Tassunga killittariaqariaqarnerput oqariartorneruvoq erseqqarissoq, tassa Issittumi Siunnersuisoqatigiinni Naalakkersuisooqatigiinni Naalakkersuisunilu suliavut unitsikkallarpavut isumaqatigiinniarnerit naammassinissaasa tungaannut. Taamalu aalajangersimanerput peqquteqarpoq, issittumi tunngasut oqallisigineqartillugit, soorunami Nunatsinninngaanniit nerrivimmik isumaqatigiinniarnerni issiaveqartitaanissatsinnik oqariartoratta.
Naalakkersuisut siulittaasuata Aleqa Hammondip aamma oqaatigaa, ataatsimiinnermut takkutinnginnini nunarsuarmioqatitsinnit aalassassimaarutigineqalersoq, imalu Aleqa Hammond nangilluni oqarpoq.
- Ersarissisoq unaavoq, Kalaallit Nunaata ataatsimiinnermi peqataannginnerat inuiannit assigiinngitsunit aalassassimaarutigineqalermat oqarlutik sooq aamma kalaallit Issittumi Siunnersuisoqatigiit isumaqatigiinniarneranni issiaveqartinneqassanngillat? Uangut oqoriartornerput taamaattooq taama tamanut apuunneqarpoq. Aamma Danmarki uangut isumaqatigiinniarnerni peqataasariaqarnitsinnut ammanerulerpoq, issiavimmillu pisariaqartitsinerput assoroorullugu pingaartikkipput takuneqalerpoq.
Naalakkersuisut siulittaasuat, Aleqa Hammond taama oqarpoq.
