Aleqa: Naalakkersuisut politikkiat sangujoraarpoq

Aatsitassanut Naalakkersuisoq, Ove Karl Berthelsen Qanoruumut siornatigut ima oqarpoq:

- Qinngornernik ulorianartunik annertuallaanik akulinnik piiaannginnissaq suli aalajangiusimavarput, kisiannili naliginnaasunik qinngornilinnik piiaanissaq annertunerusumik akornutissaqanngilaq.

Siumup siulittaasuata, Aleqa Hammondip taama nalunaaruteqarneq tupaallaatigaa:

- Aatsitassanut Naalakkersuisoq allatoqqissaaq nipilimmik Qanoruumut oqaluleriasaarpoq, tamannalu pissutigalugu paragraf 36 apeqqutigaara, Naalakkersuisut allatut isummersimanersut aammalu Naalakkersuisut politikkiminnik sangujoraartumik ingerlalersimannginnersut paaserusullugu.

- Naalakkersuisooqatigiit oqariartuutaat ima paasivarput, Nultolerancep atuutsinneqarnissaa attatiinnarneqassasoq, tassalu ulorinartunik qinngornernik akullit piiarneqanngivissorneqassasut, Aleqa Hammond oqarpoq.

Uranitalinnik piiaannginnissaq Naalakkersuisunik suli aalajangiusimaneqartoq Ove Karl Berthelsenip oqaatigaa.

- Qinngornernik ulorianartunik sippuisunik piiaanissaq Naalakkersuisut namminneq atorunnaarsissinnaanngilaat. Inatsisartut kisimik tamanna atorunnaarsissinnaavaat, Ove Karl Berthelsen oqarpoq nangillunilu:

- Qinngornernik ulorianartunik piiaannginnissaq 80-kkunnili atuutsinneqalersoq, suli ulloq manna tikillugu atuuppoq.

Uranitalinnik piaannginnissamik isumaqatigiinneq imaaginnarpoq, qinngornerit ulorianartut naliginnaasut qaangerneqarsimappata piiaasoqassanngitsoq.

Ove Karl Berthelsenip erseqqissaatigaa naliginnaasumik qinngornilinnik piiaanissaq ajornartorsiutaasinnaanngitsoq, aammalu piiaanissaq inerteqqutigineqarneq ajortoq. Taamalu oqarnera Aleqa Hammondip akuersaarsinnaanngilaa.

- Nultolance isumaqarpoq nultolerance, tassalu akuersaarneqassanngilluinnarpoq. Oqaluttoqalissanngilaq 0.0006-ummat akuerineqarsinnaalersoq, sulimi ulorianartunik qinngorneqarpoq.

Inuit Ataqatigiit politikkikkut oqaaseqartartuata, Aqqaluaq B. Egedep ualimut nalunaaruteqarluni oqaatigaa qinngornernik ulorianartunik akulinnik piiaasoqannginnissaa suli attanneqartoq.