Aleqa: Naalakkersuisut ammanerulerniarnerat kiisami
- Naalakkersuisoqatigiit 2009-mili atuutilernerminnut atatillugu, inuiaqatigiinni ammasumik, tamat peqataaffigisaannik ingerlatsiniarlutik neriorsuutiginikuugaat maluginiarparput, Siumup siulittaasua Aleqa Hammond oqarpoq. Tamannami piffissanngorsoraa.
- Massakkut ukiut marluk qaangiutereernerani kingusikkaluartoq tamanna ajunngitsutut nalilerusuppara, taamatut oqartoqarnera neriuuteqarluarfigigatsigu, Siumup siulittaasua oqarpoq.
Tassami Aleqa Hammond isumaqarpoq, paasissutissiisarneq isornartoqarpallaarsimasoq.
- Uani uuliasiornermut misissueqqissaarnermut tunngatillugu paasissutissat avatangiisitsinnut qanoq uloriartiginerinut tunngasut amma qanoq ittuunerinut tunngasut, naalakkersuisunit paasissutissiissutigineqannginnerat inuiaqatigiinni toqqissisimannginnerujussuarmik pilersitsivoq, aamma akuutitsinnginnerujussuarmik pilersitsilluni. Tamanna allanngortinneqartariaqarpoq, naalakkersuisut inuiaqatigiit pillugit toqqissisimanissaallu pillugit sulisussaammata, Aleqa Hammond oqarpoq. pingaartutullu taallugu paasissutissat saqqummiunneqaannaratik aamma kalaallisut saqqummiunneqartarnissaat pingaaruteqartoq.
- Isumaqarpugut Naalakkersuisut paasissutissanik isertuussingaarmata, allaanngilaq inuiaqatigiit kalaallit aamma Greenpeacekkormiuusut. Paasissutissanik inuiaqatigiit kalaallit pisariaqarput, aamma inatsisartuni ilaasortat paasissutissinneqartarnissaat pingaaruteqarluinnartuusoq isumaqarpunga. Naalakkersuisut kikkut tamaasa akeraasinnaasutut isigissagunikkik, eqqarsartaaseq tamanna qimattariaqarpaat, tassami inuiaqatigiit sullissatik paasitilluarlugit ingerlatsisariaqaramik, Aleqa Hammond naggasiivoq.
