Aleqa: Naalagaaffeqatigiinneq innarlerneqarsinnaavoq
- Pinerliiniat killilersimaarneqarnissaannut uagut kalaallit aamma pisussaaffeqarpugut, kisianni tamanna ima paasineqassanngilaq Danmarkip amerikamiut pisinnaatissagai iluarisaannarminnik silaannartatsinnik atuisinnaanissaannut, nunanut allanut aamma sillimaniarnermut ataatsimiisitaliami ilaasortaq, Aleqa Hammond taama oqarpoq:
- Sorsoqatigiissagutta aamma anguniagaqatigiissagutta nunat pineqartut tamarmiulluta suleqatigiinnissarput pingaaruteqarpoq, Aleqa Hammond oqarpoq.
Danmarkip pisussaaffini naapertorlugu Kalaallit Nunaannut nassuiaasariaqartoq Aleqa Hammond isumaqarpoq:
- Massakkut pingaaruteqartorujussuuvoq Danmarkip, pisussaaffini naapertorlugu, kalaallinut nassuiaanissaa ilumut tusarrajunneqarsimasut ilumoortortaqarnersut, ilumoortortoqassappatalu naalagaaffeqatigiinnerup iluani imaannaagitsumik oqaloqatigiinneq aallartittariaqassooq.
Københavnip Universitetiani inatsisilerinermut professori, Hanne Petersen ippassaq radioaviisimut oqarpoq, oqartussaassuseqarneq pingasoqiusaasoq, tassalu USA-p Kalaallit Nunaanni sakkutooqarneq oqartussaassuseqarfigalugu, Danmarki nunanut allanut inatsisitigut takussutissaannarmik oqartussaasoq. Hanne Petersenilu nammineerluni isumaqarnerarpoq, Kalaallit Nunaat kultureqarnikkut inatsisitigullu takussutissaannarmik nunamut namminneq oqartussaasoq.
- Taamaakkaluarpalluunniit amerikamiut isumaqassanngillat silaannartarput iluarisaannarminnik atorsinnaallugu, Aleqa Hammiond oqarpoq, nangillunilu:
- Pinerliinianut akiuuteqataanissarput apeqquserneqarsinnaanngilaq, imaanngilarli amerikamiut silaannartarput iluarisaannarminnik atussagaat, tassami uanga isumaqarpunga Danmarki pisussaaffeqanngitsoq uagut avaqqulluta silaannartatsinnik atuisinnaatitaassalluni.
Kalaallit Nunaata aamma Danmarkip akunnerminni ataqqeqatigiillutik ingerlaannassappata aammalu nuna pingajuusoq pineqartillugu, tassalu USA-p silaannartatsinnik atuisinnaanera pineqartillugu, nalunaaqatigiittarneq minnerpaamik piumasarineqartariaqartoq, Aleqa Hammond isumaqarpoq.