Aleqa: Kinguaassiutitigut atornerlugaasut Naalakkersuisut sumiginnarpaat
Pinerlunnerit kinguaassiutinut tunngasut politiit ulloq unnuarlu nalunaarusiaanni takussaajuarput. Politiit kisitsisaataat malillugit kinguaassiutinut tunngasunik pinerlunnerit 2010-mi 371-upput. Taakku saniatigut 2010-mi pinngitsaaliinerit pinngitsaaleeriarnerillu 159-upput,
Taamaammat Siumukkormiut utaqqikatappaat kinguaassiutitigut atornerlunneqarsimasunik katsorsaavissaq. Taanna pilersinneqassasoq Naalakkersuisunut ukiut marluk matuma siorna Inatsisartunit suliakkiissutigineqarpoq.
- Illorsuit kusassarneqartalernissaannut aningaasaliiniarlutik Naalakkersuisut aalajangerput. Pingaaruteqarluinnartutunngooq isumaqarfigigamikku aammagooq taamaattunut akissaqartariaqaratta, Siumup siulittaasua Aleqa Hammond uparuaavoq.
- Sunaana pingaarnersiuineq taama inuppalaanngitsigisoq naalakkersuisooqatigiit ingerlakkaat?, Aleqa Hammond nangippoq ujartorlugulu katsorsaaviliassaq sumiinnersoq.
Naalakkersuisut nassuerutigaat kinguaassiutitigut atornerlunneqarsimasut inersimasunngornerminni ajornartorsiuterpassuaqartartut. Taamaattumik tapersersorpaat IA-meersup Juliane Henningsenip siunnersuutaa Naalakkersuisut peqquneqassasut iliuusissamik pilersaarusiornissamik. Tamannali Aleqa Hammondip naammaginngilluinnarpaa innersuussutigaalu ukiut marluk matuma siorna Inatsisartut peqqusinerat.
Naalakkersuisut akissutigaat meeqqaniit aallartillutik suliniarneq aallartissimagitsik taamalu meeqqat kinguaassiutitigut atornerlunneqarsimasut ornittagassaannik illumik pilersitsisimallutik.
- Taamaammat naliliisimavugut sukkasuumik periarnikkut sinaakkusiilluarnerusinnaalluta, taamaaliornikkut kanngutsaatsuliorsinnaaneq taassumalu kingunerlutsitsisinnaanera annikillisarneqarsinnaammat, ilaqutariinnermut Naalakkersuisoq Mimi Karlsen oqarpoq.
