Aleqa Ittuk ikkarlittoq
Ilaasartaat Aleqa Ittuk, Qeqertarsuup Tunuani nalunaaquttap akunnerata ataatsip matuma siornagut nunaqarfiup Kitsissuarsuit eqqaani 100 meterisut avasissusilimmi ikkarlippoq.
Allattoq Elisa Isaksen
septembarip 03-at 2008 17:24
Aleqa Ittuk Qeqertarsuarmiit 15-20-t missaannik ilaasoqarluni Aasiannut ingerlaartilluni ikkarlippoq.
Disko Linep pisortaa Ole Dorph eqqissisaalluni oqarpoq, annerusumik ajortumik pisoqanngitsoq.
- Ilaasartaat immakkiartunngilaq, uerulooqqananilu. Umiatsiaararpassuit nunaqarfimmiit ilaasartaammut takkussuupput, ilaasullu Kitsissuarsunnukaassorlugit. Ulinnissaa utaqqissavarput, naatsorsuutigaarpullu Aleqa Ittuk ulippat ikkarliffimminit kaanngarumaartoq Aasiannullu ingerlaqqilluni, Disko Linep pisortaa oqarpoq.
Kitsissuarsuit eqqaanni maanna tininngasorujussuuvoq, erniinnarli ulimukalernissaa naatsorsuutigineqarluni.
