Aleqa Hammondip tusagassiuutinut nalunaarutini oqallisigerusunngilaa
Sanaartornissamut aningaasaliissutit ilarpassui, aningaasanut inatsimmi akuersissutaareeraluartut, pilersaarusiornerlunneq pissutigalugu suliarinnittussarsiuunneqartannginnerat, aamma kingusinaarujussuarluni aallartinneqartarnerat Sulisitsisut Peqatigiiffiata Radioaviisimi arlaleriarluni isornartorsiortarpaa. Ajornartorsiummut tassunga takussutissaalluni "Sanaartornermut aserfallatsaaliuinermullu aningaasaateqarfimmi" aningaasat millionit koruunerpassuit ukiumit ukiumut nuuginnarneqartartut.
Allattoq Elisa Isaksen
novembarip 10-at 2013 15:12
Sanaartornissamut aningaasaliissutit ilarpassui, aningaasanut inatsimmi akuersissutaareeraluartut, pilersaarusiornerlunneq pissutigalugu suliarinnittussarsiuunneqartannginnerat, aamma kingusinaarujussuarluni aallartinneqartarnerat Sulisitsisut Peqatigiiffiata Radioaviisimi arlaleriarluni isornartorsiortarpaa. Ajornartorsiummut tassunga takussutissaalluni "Sanaartornermut aserfallatsaaliuinermullu aningaasaateqarfimmi" aningaasat millionit koruunerpassuit ukiumit ukiumut nuuginnarneqartartut.
Aningaasaliissutilli taakku atorneqarsinnaanerat periarfissaqanngitsoq, Aleqa Hammondip oqaatigaa.
- Brian Buus-ip uppernarsaatissaqanngitsumik "aningaasarpassuit uninngaannartut aamma suliniutinut arlalinnut aningaasaliisoqareersimagaluartoq sanaartugassat uninngatiinnarneqartunik" oqarnera isumaqatiginngilara, Aleqa Hammond tusagassiuutinut nalunaarummini allappoq.
Taamali oqaaseqarnera Sulisitsisut Peqatigiiffiata pisortaata Brian Buus Pedersenip paasiuminaatsippaa.
- Tusagassiuutinut nalunaarummi inerniliullugu oqaatigineqartoq ilisarisinnaanngilara, oqallinnermimi tamannarpiaq GA-mit uparuarparput. Nalunaarusianimi sanaartornermut aserfallatsaaliuinermullu aningaasaateqarfimmeersuni, Naalakkersuisut namminnerlutik suliaanni taama allassimasoqarmat, taamaattumik tamanna tupaallaatigaara, Brian Buus Pedersen oqarpoq.
- Naalakkersuisup tamatumunnga akisussaasup akissuteqarfigissagaa innersuussutigissavara, Naalakkersuisut sinnerlugit akissuteqarusuppunga, Naalakkersuisulli ataatsiakkaat sinnerlugit akissuteqarusunnanga, Aleqa Hammond oqarpoq.
Tamannali pillugu tusagassiuutinut nalunaaruteqarputit. Tusagassiuutinut nalunaarutit malillugu iliortariaqassaatit?
- Aap, soorunami. Taannami aamma innersuussutigaara, Aleqa Hammond oqarpoq.
Tamannali paasisinnaanngilara, aamma GA oqaloqatigigakku aamma taakku paasisinnaannginnerarpaat.
- Piffissami matumani kattuffiit ataasiakkaat nalunaarutaat oqaaseqarfigerusunngikkallarpakka, aningaasanummi inatsisissaq suli isumaqatigiinniutigineqarmat. isumaqatigiinniarnerillu maanna ingerlasut ataqqivakka, Aleqa Hammond oqarpoq.
Kisiannimi GA-mit taama oqaaseqanngillat illinuna oqaaserisatit oqaloqatigiissutigerusukkikka.
- Oqaatigineqareersut aamma innersuussutigaakka allanillu tamatumunnga tunngasunik oqaasissaqanngilanga, Aleqa Hammond oqarpoq.
Tamatuma kingorna aningaasanut naalakkersuisoq Vittus Qujaukitsoq oqaloqatigaarput, tassa paaserusukkatsigu sooq aningaasat atorneqaratik uninngaannarnersut.
Taassuma oqaatigaa, suliniutinut aningaasaliisoqareersoq, assigiinngitsunilli patsiseqartumik kinguaattoortoqartoq.
- Matumani ilaatigut pineqarput inissiarsuit illoqarfinni assigiinngitsuniittut isaterneqartussat nutarterneqartussallu. Tamatumanilu pcb-nik akullit avatangiisinut peqqissutsimullu qanoq kinguneqarsinnaanerinik nalilersuinissaq utaqqimaarneqarluni. Ajornartorsiutit assigiinngitsut matumani isiginiartariaqarpavut, Vittus Qujaukitsoq oqarpoq.
Taassuma ilanngullugu nassuiaatigaa, suliassat ataasiakkaat ataasiakkaarlugit misissuiffigineqarlutillu naliliiffigineqartariaqartut.
- Ineqarnermut Naalakkersuisunngorlaap suliassat aallartittussaassavai, matumani sanaartornermut aserfallatsaaliinermullu aningaasaateqarfimmeersunik atuinerunissaq ilanngullugu, Vittus Qujaukitsoq naggasiivoq.
