Aleqa Hammondip isornartorsiuinera IA-p akueriumanngilaa
Naalakkersuinikkut ingerlatsineq kikkunnit akisussaaffiigineqarmat soorlu puigupassinneqarsimasoq - taakkualu pilersaarutinik saqqummiussisartussaapput, Kuupik V. Kleist oqarpoq
- Saqqummiussuisoqarnissaq, susoqarnissamillu pilersaarutinik saqqummiussisussat, tassaapput Naalakkersuisut akisussaaffiat - illuatungiliuttut tamanna akisussaaffigisinnaanngilaat, Inuit Ataqatigiit siulittaasuat Kuupik V. Kleist oqarpoq.
Naalakkersuisut siulittaasuata, Aleqa Hammondip, naalakkersuisut siulii - tassalu Inuit Ataqatigiit, Demokraatit Kattusseqatigiillu pisuutippai, inuiaqatigiit aningaasaqarneranni innuttaasunullu malunnaatilimmik pitsanngorsaataasinnaasunik angusaqarsinnaasimanngitsut, taamaattumillu Inatsisartunut qinersinermi kingullermi innuttaasunit tununneqartut. Kuupik V. Kleistip Aleqa Hammond kaammattorpaa siumut isigeqqullugu
- Qineqqusaarneq qaangiutereerpoq, naalakkersuisullu akissussaaffitsik naapertorlugu pilersaarutitik, aamma ungasinnerusoq eqqarsaatigalugu qanoq iliortoqarnissaanik pilersaaruteqarnerlutik, inuiaqatigiinnut nalunaarutigisariaqarpaat, Kuupik V. Kleist oqarpoq.
Illuatungiliuttut tulleriaarinissamut amigaatigineqarnerarlugit Aleqa Hamond aamma isornartorsiuteqarpoq. Kuupik V. Kleistilu tamatumunnga ima akivoq:
- Taama saqqummiussineq allamut saasaanertut isikkoqarpoq - uteqqiinnassavaralu Nunatsinni naalakkersuinikkut ingerlatsineq Naalakkersuisut akisussaaffigaat, Kuupik V. Kleist oqarpoq.
Illuatungiuliuttunut isornartorsiuilluni allakkani Naalakkersuisut nittartagaanut inissinneqarsimanera Naalakkersuisut siulittaasuanit eqqumiiginartinneqarpoq.
- Eqqumiigitallappara siornatigut takunikuunnginnakku pisortatigoortumik Naalakkersuisut nittartagaat atorlugu partiinut saassunertut atorneqartoq, Inuiat Ataqatigiit siulittaasuat, Kuupik V. Kleist, oqarpoq.