Aleqa Hammondip illuatungiliuttut isornartorsiorpai
Naalakkersuisut siulittaasuata Aleqa Hammondip qinersinerup ukioq ataaseq qaangiunneranut atatillugu erseqqissaatigaa innuttaasut qinersinerminni naalakkersuisut siuliinik, taakkulu iliuuseqarsinnaannginnerannut tunutsisimasut.
- Naalakkersuisut siuliisa erseqqissumik iliuuseqannginnermikkut pingaarnersiuinnginnermikkullu inuiaqatigiit aningaasaqarneranni aamma Kalaallit Nunaanni innuttaasunut malunnaatilimmik pitsanngorsaataasinnaasunik angusaqarsimanngillat, Aleqa Hammond allappoq.
Ullumikkulli Naalakkersuisuusut allanngortitsisimasut isumaqarpoq, assersuutitullu taavai suliassanut angisuunut inatsit aaqqissuussaq akuersissutigisimallugu kiisalu uranimik aatsitassanillu allanik radiop qinngorneranik akulinnik attueqqusinnginnermik politikki atorunnaarsissimallugu.
-Attueqqusinnginnermik politikkip pisuussutitsinnik atorluaanerunissatsinnik ukiorpassuarni killilersorsimavaatigut, Naalakkersuisut siulittaasuat allappoq. Nassuerutigaali Naalakkersuisut pingaarnersiuisimanerat sukkortusimaqisoq, taamaanneralu inuit ilaannut annernarsimassasoq.
Illuatungiliuttut erseqqinnerusumik illuatungiliisarnissaat ujartorpaa, ullumikkullu Naalakkersuisuusut ukiuni sisamani qinigaaffimminni aalajangigaannut tunngatillugu allanik periarfissaqarnerannik innuttaasunut tikkuussisarnissaat kissaatiginerarlugu.
Illuatungiliuttut Naalakkersuisuutitaqartuugunik qanoq iliorsimassagaluarnerlutik suli nassuiaateqarsimannginnerat Aleqa Hammondip tikkuarpaa, isumaqarporlu nassuiaasariaqaraluartut, qinersinermilu tullermi naalakkersuisuutitaqalissagaluarunik aalajangiuteriikkanik allanngortiterissanersut apeqqutigaa.
-Aatsitassarsiornermut tunngatillugu ineriartorneq Naalakkersuisut aatsitassanut periusissiami eqqartugaat illuatungiliuttut kissaatiginngikkunikku innuttaasut oqaluttuuttariaqarpaat amerlanerusut soraarnerussutisiaqalernissaannut ataatsimoortumillu tapiissutit annikillisikkiartuaarnissaannut atatillugu nunatta karsiani aningaasat amigaataalersussat sumit aassanerlugit, Aleqa Hammond aperaaq.
Aamma allappoq Kalaallit Nunaata neqeroorutigisinnaasai pillugit assoroorluni sulilluni, suliallu nunani tamalaani akuerineqariartuaartut. Naalakkersuisut Uliamut Atsitassanullu Periusissiaanni allassimasutut ineriartornerup sulissutigineqarnerata nanginnissaa eqqarsaatigigaat erseqqissaatigaa.