Aleqa Hammond taxarnermi kingorna akiliiumasimanngimmat politiinut nalunaarutigineqarpoq
Pisimaasoq ajuusaarutigaara, aamma taxamik ingerlatitsisoq ajuallatsissimagakku utoqqatserpunga, naalakkersuisunut ilaasortaq Aleqa Hammond oqarpoq.
Aleqa Hammond tallimanngornermi maajip ulluisa 16-iani ullaaralaakkut Nuummi politiinut nalunaarutigineqarpoq. Aleqa Hammond Inatsisartut upernaakkut ataatsimiinnerat naggataarnersiorlugu sisamanngormat unnukkut katerisimaarnermi peqataavoq. Naggataarnersiorneq imeruersaaserluarlugu nerrinnermik ingerlanneqarpoq.
Tusarfiit tutsuiginartut naapertorlugit Aleqa Hammond taxa-ssarsiorluni sianerami assut putumasimavoq, taamalu naalakkersuisunut ilaasortaq sivikitsumik taxa-reerluni taxanut akiliiumasimanngilaq. Taamaariarmat taxanik ingerlatitsisoq politeeqarfiliarsimavoq, naalakkersuisunut ilaasortaq nalunaarutiginiarlugu.
Politimesterip tullersortaata Morten Nielsenip uppernarsarpaa, Nuummi politiit innuttaasumiit nalunaarutiginninneq tigusimagitsik.
– Suliaq inuit akornanni saqitsaannertut isigaarput, Morten Nielsen oqarpoq. Aleqa Hammondip taxamut akileerusussimannginnini nassuerutigaa.
– Taxanik ingerlatitsisup politiinut suliassanngortissimagaanga tusarpara, suliarlu taanna uanga taxanillu ingerlatitsisup akunnitsinni aaqqitassaavoq. Akiligassaq akilerneqartussaammat taxacentraali oqaloqatigereerpara. Centraalip pisortaata erseqqissaavigaanga, pisimasoq taanna ajornartorsiutaanngitsoq ajornartorsiutitaqanngitsumillu aaqqinneqassasoq.
– Taxanik ingerlatitsisoq ajuallatsissimagakku utoqqatserpunga. Inuk taanna attaviginiarsimagaluarpata, kisianni suli iluatsinngilara, Aleqa Hammond Sermitsiamut oqarpoq.