Aleqa Hammond: Soorunalimi inatsisartut inatsisiliaat malitassaraarput
-Soorunalimi inatsisartut inatsisiliaat malitassaraarput, taanna avaqqunneqarsinnaanngilaq, aamma malitassarisartussaavarput. Uanili eqqartuussisulerisut Nuna-minngaanneersut naliliinerat uagut naalakkersuisuninngaaniit naalagaaffiup sullissisartumit nalilertinniarparput. Taanna pereerpat, soorunami naliliineq piareeriarpat, naammassillunilu, taava inatsisartut kukkunersiuinermut ataatsimiititaliaanut soorunami tunniutissavarput aammalu innuttaasunut tamanut takusassanngortillugu saqqummiunneqarumaarpoq. Aleqa Hammond apersorneqarluni nassuiaavoq.
Siunissami imaassava, inatsisartut ataatsimiititaliat suliaqaraangata taava naalakkersuisunit soqutiginanngiinnartassasut? Aleqa Hammond aperaarput. Akivorlu:-Naalakkersuisut taamak suleriuseqanngillat aamma taamak suleriuseqanngisaannarput. Pingaaruteqarpoq uuma suliap pingaartorsiutigineqarluni aammalu suliarilluarneqarnissaa pingaartipparput. Naliliinerit assigiinngitsut marluk isigineqartariaqarput, qulakkeerumallugu aalajangiineq pitsaasuusoq, tamatta suliaqaqqinnissatsinnut, paatsuungassuteqanngitsumik suliarineqarniassammat.
