Apeqqusersornagu tusaatissatut tiguinnassagaat kaammattuutiginarpoq, taanna allappoq.Assi: KNR

Aleqa Hammond Siumumut uteqqinnini pillugu: Akueriinnarsiuk

- Inuup partiimut sorlermut ilaasortaasinnaanerminut pisinnaatitaaffia apeqquserneqarsinnaanngilaq, tamanna akueriinnagassaavoq, Aleqa Hammond taamatut isumaqarpoq.

Aleqa Hammond Siumumut uteqqippoq.

2016-imi Aleqa-p partii qimappaa, Folketingimi kreditkort-iminik atornerluisimanermi kingorna. 

Taassuma uteqqinnera tamanit oqallisigineqalerpoq. KNR-ip inuit aqqusinermi naapitat ataasinngormat apersorpai, Aleqa-p Siumumut uteqqinnera pillugu isumasiorlugit. 

AAMMA ATUARUK "Inuit Aleqa Hammondip Siumumut uternera pillugu: Sooruna? "

Tamakkua isumaat assigiinngillat. 

Inuit eqqumiiginninnerat Aleqa Hammond-ip qisuariarfigaa. Isummanimi Facebook-imi allaaseraa.

Taanna tassani imatut allappoq:

- Inuk partiimut sumulluunniit ilaasortaaffeqarsinnaanermigut apeqqusersuutaasussaanngilaq akuersaagassarliuna. Apersuiniartuinnanngorlutik. Apeqqusersornagu tusaatissatut tiguinnassagaat kaammattuutiginarpoq, taanna allappoq.

 

 

Aleqa Hammond KNR-ip apersorniaraluarmani apersorneqarusugani Facebook-imi allakkaminut innersuussiinnarpoq.

Aleqa Hammond pillugu:

 

- Aleqa Hammond Grønlandsbankenimi kontumini aningaasaateqarani akiliummik katillugit 5.100 koruuninik 90-ikkunni atuisimavoq. Taassuma akiliissutini matoqqasoq qaammatini marlunni atorlugu akiliissutigisarsimavaa. Tassa kortini matuneqareersoq Hotel Godthåbimi sippuilluni atorsinnaasimavaa.
 

Aleqa Hammondip pisut politiinut nassuerutigai 1996-imilu unnerluutigineqarluni. Suliarli Berlingsip saqqummiineranitigut tamanit 2013-imi aatsaat ilisimaneqalerpoq.

 

- 2008-imi Aleqa Hammond Aningaasaqarnermut nunanullu allanut tunngasunut Naalakkersuisuunermi nalaani, aalakoorluni akiligassaq akilernagu taxaniit qimaasimammat, Nuummi Politiinut unnerluunneqarpoq. Suliarli kingorna annerulersinneqarani matuneqarpoq.

 

- 2013-imi Aleqa Hammond Naalakkersuisut siulittaasunngutsiareerluni pisortat aningaasaataanik atortarsimasoq kukkunersiuinermut ataatsimiititaliap paasivaa. Aleqa Hammond 204.000 koruuninik Namminersorlutik Oqartussat aningaasaataanik atuisimavoq. Kukkunersiuisullu arlaleriarlutik akileeqqusisareersut, Aleqa Hammondip 2014-imi aningaasat Nunatta karsianut utertippai.

 

Nunatta karsianit tigusisimanerup kingorna Aleqa Hammond ukiup aappaa avillugu Naalakkersuisunut siulittaasooreerluni tunuarpoq, kinguninngualu nutaamik inatsisartunut qinersisoqarluni.

 

- Aleqa Hammondip Folketingimi ilaasortaanerminut atatillugu kreditkorterisani atorlugu 13.000 koruunit nalinginut imminut pisiortorsimasivoq, e-mailimi Ekstra Bladep saqqummiussaani tamanna atuarneqarsinnaavoq.

 

Hammondip allaffissornermi paatsooqatigiittoqarsimaneranik aallaqqaammut nassuiaatigigaluarpaa. Nassuiaateqarninili kingorna utertillugu. Suliaq taanna Siumumit ilaasortaajunnaarneranik kinguneqarpoq.

AAMMA ATUARUK Erik Jensen Hammond pillugu: Nukiit tamaasa atorfissaqartippagut

Aleqa Hammond Namminersorlutik Oqartussat aningaasaataannik imminut tunngassuteqartunut atuisimanera pillugu suliaqartoqareersoq, Naalakkersuisut siulittaasuatut 2014-imi tunuarpoq.

Ukiup tullissaani Siumut sinnerlugu folketingimut qinigassanngortippoq, qinigaallunilu, tassanili Hammond pillugu ajutoorutaasumik suliaqartoqaqqippoq. Tamatumuuna Folketingimit akiliummik atornerluineq pineqarpoq.

Siumulli maanna siulittaasuata politikerip misilittagaqartup politikkikkut sulinera pisoqarfiusoq ajornartoqartinngilaa:

- Uagut isumaqarsimavugut tamakku pisimasut aallaavigalugit ingerlaqqittoqarsimasoq, aammalu  tutsuiginassuseq annertooq pigineqalersimasoq. Taamaalilluta Siumup naleqartitaanik naammassinninnissamik piumassuseqartoqartoq aammalu taakkuninnga malinninniartoqartoq, Siumup siulittaasua oqarpoq.

Aleqa Hammond Folketingimi qinigaaffiup kingorna Nunatta Qitornai sinnerlugit nunatsinni 2018-imi qinersinermi sassarpoq.

Tassanili isernissamut naammattunik taaguunneqanngilaq, parteeqataatali, Vittus Qujaukitsup naalakkersuisunngornermi kingorna sulinngiffeqarniarnerani paarlaalluni.



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat